Shah jied Nokma U Chairman ka ANVC-B

Shillong, 11’lyngkot:
U Chairman ka ANVC-B, ka seng lehnoh kaba la wan ia suk bad ka sorkar u Bernard Marak uba ju khot sin kum u Rimpu u la shah jied ban long kum u khieh nong synshar lane u Nokma jong ka Danakgre akhing, kaba dei ka jaka kaba kynthup lang ia ka sor Tura, la thung Nokma ia u Rimpu ha ka 2 tarik u kyllalyngkot. U Rimpu hadien ba u la shah thung kum u Nokma u la iathuh ba ka thong jong u ka dei ban ia khun ia ka jingshah nion bein ki riewlum, kaba ym shym la lah ban leh baroh shi katta.
U Rimpu u la kular ba hapoh ka jingpeit jong u kum u Nokma un peit ba kan ym don kano kano ka jingthur mur, kaba kynthup ia ka jingwan buhai shnong ki briew ba nabar, ka jingwan shnong be-ain , ka jingshah knieh jaka, ka jingai pata khyndew kaba be-ain, ka jingshongwai bad kiwei ki kam ba iadei bad u paidbah. U la bam smai ruh ba un pynthikna ba ka shongsuk shongsain kan don hapoh ka thain, ban wad ia ki lad myntoi ia ki samla, bad ban peit ia ka jingshah lehbein jingshah nion bein kiba rit ha u baheh, bad ka jingpynkhein ia ka 6th Schedule ha ka riti synshar.