Shah jied ka kynhun shad ban leit sha Las Vegas

Shillong, 28 Jylliew:
“Ngi ka kynhun shad One Unity Crew ngi la shah jied ban leit mih khmat ia ka ri India sha ka lympung World Hip Hop Dance Chmpionship ka ban long ha Las Vegas, USA hapoh ka kontrak jong ka Hip Hop International India”, la pynpaw u Abhishek Mahatu u ba dei u samla shad na ka nong bah Guahati. “Kane ka lympung ia kop shad yn pyni lyngba ka Channel VH1 yn pynlong ha ka 13 haduh 18 tarik u Nailar  bad ka kynhun yn ialam da ka A Choreo Culture Pvt Ltd “, la ong shuh u tei u samla u ba la ia wan ban synran lang da u Bah Kit Thabah na ka All Megha laya Dancer’s Association lem u Suraj Thakur ha ka jingai jingkren jong u ha ki nongthoh khubor ka nongbah ha Shillong Press Club.
Kane ka kynhun kaba don haduh 15 ngut ki dkhot bad 8 ngut ki nongshad kiba kynthup na ka jylla Meghalaya, Assam , Arunachal Pradesh bad Manipur ka pynpaw ba ka kwah ban pynpaw ka jingkyrpad sha ki bor sorkar ka jylla Meghalaya ban ioh jingiarap pisa na ka bynta katei ka jingialeit ia kop shad jong ka. “Ngi la ia kren bad ka sorkar Assam kaba la kular ban iarap haduh 5 lak tyngka na ka jingmang ba 21 lak tyngka ka jinglut ha kaba leit sha Las vegas. Ngi wan hangne ban pan ka jingiarap na ka sorkar Meghalaya ban kyntiew shuh ia ka sap ka phong kaba ki samla ki don ban mih khamt ia ka North East hi baroh kawei “, la ong u Abhishek Mahatu.
Na ka liang jong u Bah Kit Thabah , u la pynpaw ba ka jingwan jong kane ka kynhun kaba ju ithuh na ka por sha ka por bad kane ka wanrah jingmut ban shna noh da ka North-East Dancers’ Association khnang ban lah ban kyntiew shuh ia ka sap shad ha ka thain hi baroh kawei bad hapoh katei ka shatri yn lah ban ia kren ruh wat shaduh ka sorkar pdeng ka ri India na ka bynta ka jingmyntoi ki samla.
“Ka don ka jingjied ia ki khynnah ba hapoh 12 snem ban ioh rung sha ka lympung shad jong ka Channel Sony ka ba la tip kum ka Super Kid bad na ka liang ka AMDA ka la iakren bad ka Channel ban pynlong Audition ha Shillong bad ka Channel ka la mynjur ban leh da ka Online Audition ha kaba ki khynnah kin shah jied na ki Video ba la ring ha ki por ba shad bad phah peit ha ki bor pyniaid katei ka Channel”, la pyntip u Bah Kit u ba la pynpaw ruh ba ia mynta ka Association ka dang wad bniah hato ka ‘entertainment’ kum ha ka shad ka don jingiadei ne em ha ka tnad Skill Development ka sorkar jylla bad kdew ruh ba ka jingshad kum ki jingshad Hip Hop ka don ia ka jingiadei kaba jan bad ki kam ialehkai kum ka gymnastic.