Nongstoiñ: Ka long kaba sngew sarong ia ki paidbah ka thaiñ West Khasi Hills District, ban ioh sngew ba ki hynriew ngut ki thei samla ka thaiñ kiba don ia ka sap ban ialehkai Cricket kiba la iadon bynta lang bad ka kynhun Meghalaya Cricket Association (MCA) kila shah jied ban mih khmat ia ka Jylla ka jingialehkai Cricket ka ban sa long ha Guntur Andra Pradesh.
Ki 6 ngut ki thei ialehkai Cricket na WKHD ki ban sa ioh ban mihkhmat lang ia ka Jylla sha ka lympung ha Andhra Pradesh:Rupang
U bah G. Syiemlieh president ka West Khasi Hills District Cricket Association (WKHDCA) u la iathuh ba kitei ki hynriew ngut ki thei ialehkai Cricket na WKHD kiba la shah jied ban mih khmat ia ka jylla sha katei ka lympunbg ialehkai Cricket kidei kiba la tip kyrteng kum i Evanrilin S Syiem, i Lasiewspah Marweiñ, i Thymmeiingbakor L Mawnai, Sildamcresha Marbaniang, Deiphibanpynsngaiñ L Mawnai bad i Dasanbañiewkor Wahlang.
Shuh shuh u bah Syiemlieh u la ong ba ka synjuk hi ka phah ia ka jingkitbok kit rwiang ia baroh ki 6 ngut ki thei ialehkai Cricket na WKH kiba la shah jied ban mih khmat ia ka jylla ha katei ka jingialehkai ka ban sdang naduh ka 14 tarik mynta 2018 ha Andra Pradesh .
Ym tang katta u la ong ruh ba ka Synjuk ka kitbok ruh ia baroh ki thei ialehkai ka MCA ki ban mih khmat ia ka Jylla ha katei ka lympung ialehkai Cricket bad kyrmen ba kin ioh ia ka met ka phad kaba koit kaba khia bad khamtam ba kin lah ban wanrah ia ka burom bad ka nam jong ka jingjop ka ban long ka burom ym tang ia ki, hynrei ka Jylla ia ka District bad ha ki iing ki sem.