|
Ka jingiehnoh beiñ ka sorkar ïa ki shong sha ki jaka kyndong ka dang long sah ka raibi kaba la pyn matlah ïa ki khmat bad pynkyllut ïa ki shor jong ka sorkar Meghalaya lyngba ki tnad treikam ba pher ba pher. Ki Nongmihkhmat kiba kam ïalade ba ki dei kita ki nong mih khmat jong ki paidbah ki mih khmat, mih ktien bad ki mih shkor tang ha ka por election. Kawei na ki Surok kaba la shah ieh beiñ ka dei ka surok kaba ïaid na lad ban kiew sha Shillong View Point sha Rngi-Shillong ter ter shaduh kaba mih sha ka shnong Liewlong, Pomlakrai. Kane ka surok kam shym la paw rong shuh bad ka la sniew shisha haduh katta katta kaba wanrah ka jingeh kaba khraw ïa ki paidbah jong kato ka thaiñ bad ruh ïa ki briew kiba ïaid lynti manla ka sngi na kato ka lynti. Ka jinglong jingman jong kane ka surok kam ïadei dur shuh bad ka juk shai mynta ha kaba ki briew kiba sah sha kine ki thaiñ ki dei ki briew kiba la kiew ha kiba bun ki liang bad kiba la noh synñiang shi katdei eh sha ka imlang sahlang lyngba ka rep ka riang bad kiwei kiwei. Hynrei kaba i sangsot pat ba ki hap ban ïaid lyngba ïa kum ki tei ki surok khohruh khohram.
 Ka jingkylli kaba na ka liang jong nga nga kwah ban buh ka long, ki leh aïu kita ki nongtrei ka PWD haba kim ïohi bad kim tip ïa ka jing sniew ka tei ka surok? Hato kaei ka kamram jong ki? Don jingmut aïu ïa ka sorkar ba kan buh kum kine kiba shu kmen ka ïoh kam sorkar bad ki bym don ka jingkit khlieh ïala ka jong ka kam? Hato kane ka jing buh kum ïa kine ki riew alhia kam dei ba shu pynlut kai ïa ka pisa jong ngi ki riew paidbah ban siew tulop ïa ki ha ka dor kaba heh? Hato kim don jinglehraiñ ban shah kynshi kynïiw ha ki briew kiba wan shang pyrthei na kiwei kiwei ki jylla bad ki ri kiba shait ïaid lynti nangto ban kiew sha ne hiar na u Lum Shyllong? Ko Engineer!ba dei peit ha kane ka jaka, Hato phim ïa don khmat? Lada phim don mon ban trei hok ïa ka kam, balei phim shu ïa resign noh bad ai lad ïa kiwei kiba don ka mon ban shakri hok ïa ki paidbah ba kin ïoh lad ban trei ban shakri hok? Ko sorkar! Hato ka dei kane katta ka rukom wanrah Development jong phi?
Kham bun ruh sha kine ki thaiñ kiba bun ki dei ki nongrep, kiba leit die ïa ki mar rep jong ki sha ïew sha hat. Ka buh shisha ha ka jingeh ïa ki namar ha ka jaka ba ka kali kan kit kham biang kit, hap kit duna noh bad ha ka jaka ban lut duna ka bai kali bad kiwei kiwei ki bailut hap ban kut kham bun noh. Ym tang katta, kala pyn slem ruh shi katdei haba leit jingleit ne haba wan jingwan.
Kane ka jing leh sting jong ka sorkar da shisha kala wanrah ki jingeh ba bun kiba kum ki paidbah ngi ïa kynduh ha ka jing ïaid lynti jong ngi manla ka sngi. Namarkata ka daw, ko sorkar lyngba ka tnad PWD sngewbha wan peit hi da la ka jong ka khmat haduh katno ka long. Lada na ka liang jong phi phi la dep pynkhreh ka project ruh to pynkloi noh bad lada dang slem ka projek ruh to pynbha (repair) noh. Ne lada phim pat mang tyngka eiei na ka bynta ban shna bha ïa kane ka surok, sngewbha mang pisa noh kloi kloi khnang ba ki paidbah kin ym long ki ‘lang kñia tang na ka daw ka jing mynthi bad alhia jong phi.
Kumba ka surok ka dei u budlum jong ka roi ka par, kumta haba la sniew noh u budlum, ka jingim ka jynjar bad ka roi ka par ka hiran noh. Ngi khmih lynti ba ka tnad PWD kan leh ïa kaba donkam kham khloi katba lah.
Na u Nongshnong shnong ka Pomlakrai
|
Phi don ban ong eiei?