Shah Ejahar ka longkmie ba ktahkti bad kren tohmet ia u Rangbah shnong ha Ingsaw

Nongpoh:U Bah Jebes Suphai, Rangbah shnong ka Ingsaw, ka shnong kaba don ha ki thain Mawhati ha Ri Bhoi, u la ujor da ka Ejahar ha Umsohlait Police Station pyrshah ia ka Kong Volenda Nongpoh, ka Longkmie na katei hi ka shnong, kaba dei ka Nongtrei ASHA bad ruh ka Nonghikai jong ka SSA Ingsaw U.P School.

Ka nongrim kaba la pynlong ia utei u Rangbah shnong Insaw ban ujor Ejahar pyrshah ia katei ka Longkmie, ka dei halor ki nongrim ba ka la ktah kti bad kren bein ym tang ia u, hynrei ia ki dkhot Executive Committee jong katei ka shnong bad katei ka la jia tang namar ba utei u Rangbah shnong lem bad ki dkhot ka Executive Committee ka shnong, ki la leit ban kren sngewthuh ia ka ba kam bit ban saitjain ha kawei ka kor um kaba don hapoh katei ka shnong, hynrei ha kaba kum katei ka por katei ka Longkmie, ka la ktah kti ia utei u rangbah shnong bad kren bein ruh ia u da ki ktien kiba laiphewjait.

Haba batei halor katei ka jingjia, u Bah Jebes Suphai, u la ong ba ma u lem bad ka Executive Committee, ki la pynlong ia ka jingleit jurip ia ki kor um hapoh shnong kiba la tyrkhong um ha shnong, hynrei ka don tang kawei ka kor um hapoh shnong kaba mih um bad katei ka Kong Volenda Nongpoh, ka la saitjain ha kor um, katba ki nongtong um kim ioh lad shuh ban tong um namar ka Kong Volenda Nongpoh ka saitjain hapoh katei ka Kor um.

Kumta haba utei u rangbah shnong lem bad ki dkhot ka EC, ki la pyrshang ban kren pynsngewthuh ba ym bit ban saitjain ha kor um, namar ba la tyrkhong um palat ha shnong, hynrei katei ka Kong Volenda Nongpoh, ka la kren bein kren poh ia u Rangbah shnong lem ia ka EC, kumta haba la lap ba katei ka Longkmie ka la kren tohmet palat pud, u Rangbah shnong u la sei ia ka mobile phone ban Record ia ka jingkren jong ka katei ka Longkmie, pynban ha kaba kum kata ka por, ka la knieh kynthet ia ka mobile phone u Rangbah shnong bad patan ruh ia ka sopti haduh ba kan da jot.

Haba iadei bad katei ka jingleh khlem akor da katei ka Longkmie, na ka loang ka Dorbar Shnong lem bad ka Village organization, ki la pynrem jur ia katei ka Longkmie, kaba dei ruh ka Nongtrei Asha bad Nonghikai hapoh ka SSA Ingsaw U.P School.