Shah dain kuna u heh pulit ka Punjab T.10,000 ba niah thuk thuk bad ka kren mobile

Ki pulit jong ka Chandigarh, ki la dain kuna ia uwei u heh pulit, na ka daw, ba u iaid ia ka thuk thuk jongu, kaba la kut ka insurance la ar bnai bad nangta ba u kren mobile, ha ka por ba u dang niah thuk thuk.

Katei ka jingjia, ka paw pyrthei, haba uwei na ki riew paidbah, ula pyndonkam da ka social media ban thad madan ia utei u pulit, uba kren mobile bad nangta uba niah kali ar shaka.
Katei ka dur, ka dei kaba la shon ha ka Sngi Palei, ha ka nongbah Chandigarh.
La iathuh ba utei u heh pulit, u dei U Assistant sub-inspector jong ki pulit Punjab, ha kaba la dain kuna ia u shiphew hajar tyngka.
Ki pulit kim shym la iathuh ia ka kyrteng jong utei uba shah dain kuna, tangba ka dei ka thuk thuk, kaba don ia u number uba na Patiala. La iathuh ba ka insurance jong katei ka thuk thuk, ka kut ha ka 26tarik Jylliew 2019.