Shah bret ka longkmie napoh Taxi

Shillong,20 Jylliew:
Ha ka miet 19 tarik ha ka por 10 baje, kawei ka longkmie kaba la tip kyrteng kum ka kong Donalisa Kharpran ka la shah shoh ha u lok jong ka uba la tip kyrteng kum u Lurshai Kharbuli bad kumjuh ruh ha u para jong ka u Rikmen Kharbuli hapoh ka Taxi ba ka shong, katei ka kali kamai ka dei kaba don ia u nombar ML-05-9767, ha kaba ka la ujor sha ki pulit ba kitei ki ar ngut ki la bret ruh ia ka na ka Taxi haba la poi ha Laitkor,Shillong. Ka kong Donalisa ka la mynsaw jur bad la pynkit ia ka sha Civil Hospital,Shillong. Ki pulit ki la kem ia baroh ar ngut ki tei kiba la shah ujor, bad ka jingtohkit ka dang iaid shakhmat.