Shah bom iap u lehnoh ka ANLCA ha ki paidbhur

Shillong, 26 Rymphang:
Uwei u dkhot ka Achik National Liberation Central Army (ANLCA) u la shah bom iap ha ki paidbhur ha kawei ka shnong kaba don ha North Garo Hills District ha kane ka miet sngi Balang.
Kane ka jingjia ka long ha shnong Mendima haba ki nongshong shnong kane ka jaka ki la ioh bat ia ar ngut ki dkhot ka ANLCA bad tied ia ki haduh ban da jem jai, la ong u Superintendent of Police (SP) ka North Garo Hills District u JFK Marak.
Ia kine la ithuh kum u Jehan Momin na shnong Naringre bad u Sengrang Sangma na shnong Men dima.
Baroh ar ngut ki la rah sha jaka sumar ha Dainabubi PHC hynrei u Jehan Momin u la khlad noh ha lynti, la ong u SP.
Ha kawei ka jingjia, ki dkhot jong ka Garo National Liberation Army (GNLA) ki la wan ban pyndem dang shen ha ki pulit ha Dainadubi out post. Une u dkhot ka GNLA la tip kyrteng kum u Harison M Sangma uba ju khot sin kum u Ranja bad Rabal.
U Sangma u dei na shnong Dokasaram kaba hap ha Mendipathar ha East Garo Hills district u la wan ban pyndem ha ki pulit ha ka sngi Nyngkong.
La aiti lang ia ka pistol 9mm bad ki kuli, ka mobile, la ong ki pulit.
Ha kajuh ka por u lehnoh ka GNLA u Lethri T Sangma ba khot sin u Harara na Samanda Megapgre u la shah kem ha ki pulit ka Mendipathar na Salpara ha ka sngi Hatmajai.