Shah beh seng, u heh sain pyrthei, ba u kdup thiah da ki kot tyngka

Guwahati:Uwei na ki nongialam saiñ hima sima ha jylla Assam, ba la tip kyrteng kum u Benjamin Basumatary u ba baroh ki iakren ha jylla Assam, hadien ba ka la saphriang ka video bad ki dur ha ki rynsan Social Media ba pyni ba u siang thiah da ka pisa bad thiah halor jong ka pisa,u la shah wengkam noh ia lade na ka seng UPPL, kaba bat ia u lakam synshar ha Bodoland Teritorial Council (BTC) naduh u bnai Rymphang mynta u snem.

U nongialam ba rangbah jong ka UPPL, u ba long ruh u Chief Executive Member jong ka BTC,u Pramod Boro, u la pynshai ba la weng noh ia u Basamutary kum u Chairman jong ka Bhairaguri VCDC ha Udalguri District ha u bnai Rymphang bad ia ka jinglong dkhot jong u hapoh jong ka parti ha u bnai Kyllalyngkot. U Basumatary um shem don shuh kano kano ka jingiadei bad ka parti.
“Ka dur jong u Benjamin Basumatary kaba la saphriang sted bha ha ki rynsan Social Media, ngi kwah ban pynshai ba u Basumatary um shem don shuh ka jingiadei bad ka parti UPPL bad u la shah weng noh na ka parti ha ka 10 tarik kyllalyngkot 2024”.

Hadien jong ka shithi ba la phah da ka Harisingha Block Committee jong ka UPPL, ha ka 5 tarik kyllalyngkot 2024, ka BTC ka la wengkam noh na ka kam ba u bat kum u chairman jong ka VCDC ha ka 10 tarik Rymphang 2024.
U CEM jong ka BTC, u la ai ruh ia ka jingthoh ha ka 5 tarik Kyllalyngkot 2024,ba la pynmih da ka UPPL ba ki la weng noh ia ka jinglong dkhot jong u Basumatary.
Sa kawei pat ka notis la pynmih haba iafei bad ka jingweng kam noh ia u na ka Assam Panchayat & Rural Development Department ka dei namar ka jingdonkti ha ki kam beaiñ.
Kiba kum kine ki jingleh ki long ki bym iahap ia u nongmihkhmat jong ki paidbah bad ka pyn lehraiñ ruh ia ki paidbah.

Kumta la wengkam noh ia u Benjamin Basumatary Chairman jong ka Bhairaguri VDC kaba hap ha 36 No Harisingha (ST)BTC Constituency,la pyllait noh na ka kam ba u bat kum u chairman ha kane ka VCDC.
Ka jingsaphriang jong ka video bad ki dur jong u Basumatary ka la shah kynthoh jur ha kiba bun balang ha kum kane ka por elekshon.
Ka UPPL kaba la kynthoh ia ka seng Bodoland People Front (BPF) mynta ka la shah kynthoh kylla bad kam shongdor eiei ba ka UPPL ka dei ka ba don ha ka kynhun synrop jong ka BJP.

U Pramod Boro, u la kyntu ia ki lad pathai khubor ki rynsan Social Media ba kin kiar ban pyndon jingiadei hapdeng u Basumatary bad ka parti UPPL, namar u hap ban kitkhlieh ia kaei kaba u la leh bad ka parti kam don jingkit khlieh ia ki kam shimet.