U Jose Mourinho, ula shah beh noh mynta ka sngi ha ka Manchester United, hadien ba katei ka Club, kam shym la lah satia ban ialehkai bha ha kine ki sngi, ha ka jing ialam jongu.
La pynthikna ia katei ka rai ban beh noh ia U Mourinho, ha ka por mynstep mynta ka sngi bad ka United, kan siew lut ia ka pisa kaba u dang dei ban ioh, kaba long 22.5 million pound.
U Mourinho, ula don ar snem shiteng bad ka Manchester United bad ka jingialehkai kaba khadduh eh, kaba dei ha ka jingpeit jongu, ka dei ha ka jingialeh pyrshah ia ka Liverpool, ha kaba United ka shah rem da 3-1 ha ka Sngi U Blei ba ladep. La iathuh ba ia katei ka rai ban weng noh ia U Mourinho (55), ka dei ha ka miet jong ka Lah Sngi U Blei.
Ka jingshah weng jong U Mourinho, ka dei eh, hadien ka jingbym lah ka United ban ialehkai bha ha ka Sngi U Blei bad la iathuh ruh ba ka jing bym ailad jongu ba un ialehkai U Paul Pogba, ha katei ka sngi, ka dei ka daw bah, kaba la pynlong ba un shah weng na katei ka Club.
Haduh mynta ka Manchester United, ka don ha ka kyrdan kaba hynriew jong ka jingialehkai Premiere League, ha kaba ka ioh 26 point.