Shah beh krad 37ngut ki bar Jylla, ha ka KSU ha Mariam

Nongstoin, 18 Nailur:
Ki bar Jylla kiba la wan ban trei ha ka jingialam jong ka kompeni BSC C&C JV, kaba la thmu ban pyntrei ia ka surok Nongstoin – Mawthabah, ki la shah beh krad noh ha ki dkhot jong ka KSU West bad South West Khasi Hills District mynta ka sngi ha ka Shnong Mariam SWKHD, namar ka jingbym biang ki kot ki sla ba donkam.
Ia katei ka jingleit khynra ia ki bar jylla  la ialam ia ka kynhun da u samla Wellessly Lyngkhoi, Seretary ka KSU WKH bad Forward Nongrem, secretary ka KSU SWKH, hynrei ha shuwa ba ki dkhot jong ka seng kin poi ha katei ka jaka na ka liang ki pulit hapoh ka jingialam u Addl. SP ka SWKH, u  Bashan J. Laloo ki la dep ban pahara bha ia katei ka jaka ba don ki bar jylla khnang ban the lakam lada jia ba don ka jingia klumar.
Ha katei ka jingleit khynra ki dkhot jong ka seng ki la  pynlong ruh ia ka jingtalasi ia ki kot ki sla ba donkam kaba ki bar jylla ki dei ban pynbiang hynrei ha katei ka jingtalasi la lap ba kumba 37 ngut ki bar jylla kim shym la don ia ki kot ki sla ba biang, kunta ka seng ka la pynher krad noh ia baroh kitei ki bar jylla ki bym shym la lah ban pynbiang ia kitei ki kot ki sla.
U samla Wellessly Lyngkhoi u la ong ba kino kino ki bar jylla kiba khlem biang ki kot ki sla ka seng kan hap ban pynher krad beit ia ki, namar kane ka wanrah jingma kaba khraw ia ka thain ha kiba bun ki liang
bad kim bit hi ruh ban wan iuh kjat ha kino kino ki bynta jong ka District khlem da lah ban pynbiang ia ki kot ki sla katkum ka jingdonkam.
Ha kawei pat ka liang u samla Marcony Thongni Organizing secretary ka KSU, SWKH,u la pynpaw ba ka jingthmu ban shan ia ka surok 2 lane ha kane ka thain kadei beit ka buit poh jong ka UCIL ban iohlad ban tih ia u uranium na katei ka thain ha kaba mynta kala sdang sa ban  rieh tngen ha lyndet jong katei ka kyrteng jong ka kompeni shna surok (BSC C&C JV), na ka laing jong u, u la pynpaw ba ka seng kan nyng ai lad da lei lei ruh em ia ki jingthmu jong ka UCIL.
Kumta na ka liang jong kitei ki nongialam ka seng jong baroh ar tylli ki District kila  kyntu ia ki bor pyniaid jong baroh artylli ki District ba ki dei ban shimkhia halor katei ka bynta khnang ba kan ym long mawjynthut ia ki paidbah.