Shah beh ki nongtrei bar jylla u Sniawbhlang Dhar, kiba thmu rung beain sha ka jylla khlem kot khlem sla

Nongpoh: Hynnin ka miet ha ka por 8 baje ei ei mynmiet, ki dkhot ka HYC Ri Bhoi ha ryngkat bad ka MPUF, ki la pynphai dientrai noh ia ki bar jylla kiba la don da ki phew ngut bad kiba la thmu ban leit bylla sha Khyndai Lad bad Laitumkhrah, hadien ba ki la lap ba kim don ia ki kot ki sla kiba biang, ba kin wan trei bylla hapoh ka jylla.

Katkum ka jingiathuh da u Bah Tony Shylla, General Secretary ka HYC ha Ri Bhoi, la ong, ba ia kitei ki bar jylla, nyngkong ki la shah bat ha ki Pulit ka tnat Infiltration Check gate kaba don ha Byrnihat bad kim shym la ailad ba kin rung sha jylla, namar ba kim don ia ki kot ki sla kiba biang, pynban kitei ki bar jylla, kim shym la leit phai, hynrei ki la shu phet tang khyndiat na katei ka jaka, kiba la leit ban ieng lymbung ha baranda jong ka Corona Screening Centre kaba don ha Byrnihat, na ka bynta ban thawlad ba kumno ban ioh rungtuh sha ka jylla da kiwei pat ki kali.

Shuh shuh, u la iathuh ruh, ba ki la iohi ba kitei ki bar jylla, ki la leit ban ieng ha katei ka jaka ha Byrnihat, na ka liang jong ki ruh, ki la leit ban kylli pyrthew ba shano ki thmu ban leit bad kiba ki bar jylla, ki la iathuh ba ki thmu ban leit trei ia ki kam u Ma Sniawbhalang Dhar, sha ki thain Khyndai Lad bad Laitumkhrah, hynrei haba phah pyni ia ki kot ki sla, bun na kitei ki bar jylla, kim don ia ki kot ki sla kiba biang, khamtam eh ka Labour Certificate, ba ki nongtrei bar jylla ki dei ban don haba ki wan bylla hapoh ka jylla.

“Haba ngi la lap ia kitei ki bar jylla, ngi la ialam biang ia ki sha ki Pulit ka Infiltration, ban phah khmieh bniah ia ki kot ki sla jong kitei ki bar jylla, hynrei haba la poi ha katei ka jaka ba don ki Pulit, kitei ki bar jylla kim lah ban pyni ia ki kot ki sla kiba biang, kaba la pynlong syndon ia ka seng, ba kan pynphai dientrai noh ia ki” ong u Bah Tony Shylla.

Namarkata, na ka liang ka seng ka kyntu ia ki briew kiba aikam sha ki bar jylla, ba kim dei ban shim kabu ban pynrung beain khlem da biang ki kot ki sla kiba biang bad ha kajuh ruh ka por, ka kyntu ia kito ki nongaikam kiba dei ki Khasi, ba ki dei ban aikam nyngkong ia ki Khasi, namar ki don shibun ki kam ba ki Khasi ki lah ban trei, hynrei ia kiba kum kita ki kam, la shah knieh lut ha ki bar jylla, kiba la shu wanrung beain hapoh ka jylla.