Shah bat tnga jubor ka samla 19 snem

Jowai, 19 Risaw:
Lai ngut ki shyn rang briew ki la shah kem ha ki pulit ka East Jaintia Hills halor ka jingdonkti jong ki ban sloit jubor ia ka jinglong sotti ki samla kynthei.
Kawei ka samla kynthei kaba dang 19 snem na ka shnong Moolait marjan bad ka shnong Jalaphet, ka la shah batbor ha ki ar ngut ki shynrang kiba la tip kyrteng kum u Lui Bareh bad u Pyrkhat Chyrmang kiba dei na ka shnong Jalaphet. Kane ka la jia ha ka dong Pyrdong ha katei ka shnong ha ka 16 tarik une u bnai hynrei ki pulit ka EJH ki la ioh ban kem ia ki hynnin ka meit.Ka khubor ka la iathuh ba kitei ki ar ngut ki runar ki la kit ia katei ka samla lud da ka kali Tata Sumo jong u Pyrkhat sha kawei ka jaka kynjah ban leh ia katei ka kam kaba long pyrshah ia ka imlang ka sahlang.
Ha kawei pat ka jingjia, uwei pat u briew uba la tip kyrteng kum u Tomlang Lamo u la shah kem ha ki pulit Ladrymbai halor ka jingdonkti jong u ban leh-be-ijot ia kawei ka samla ha une u bnai ba la dep ha kawei ka shnong ha ka thain Rymbai- Iapmala.Ki pulit ki la dep ban kem ia ki bad mynta ki dang don hapoh ka jingbishar ka iing shari ban ai ia ka rai pynrem ne pynksan ia ki.