Shillong, 19 Jymmang:
Ka BJP Meghalaya mynta ka sngi ka la shad kmen ha nongbah Shilong hadien ba u kyrtong ka NPP u Conrad K Sangma u la jop donburom ha ka elekshon MP shiteng samoi na Tura Lok Sabha kaba la pynbna mynta ka sngi.
Hangne ha nongbah Shillong, ka BJP ka la pynlong ia ka jingkmen lang da kaba ialum ki nongkitkam bad ki dkhot hadien ba ka kyrtong ka Congress ka Dikkanchi D Shira kaba dei ka lok jong u Mukul Sangma u Myntri Rangbah ka jylla ka la shah rem kput.
Ka BJP ka la kmen ruh ia ka jingjop jongka ha Assam kaba la jop 78 ngut ki MLA kynthup ki paralok kum ka AGP bad BPF.
“Ka jingjop jong u Conrad ka pyni ba ka BJP ka la lah ban pynpra ia ka krem bah ka Congress ha kane ka jylla bad ka thain Mihngi ka India” la ong u vice president ka BJP u Banshai Khongwir.
Ka jingkhublei ka leit sha u Myntri Rangbahduh ka ri u Narendra Modi, u president rangbah ka BJP u Amit Shah badruh u president ka BJP Assam.
U la ong ka BJP ka la kiew sted bha ha kane ka thain bad kyrmen ba ha u snem 2018 kan sa pyni ia ka bor jongka ha kane ka jylla.
Ka ai khublei ia u kyrtong ka National People Party (NPP) uba dei ruh u president u Conrad K Sangma.
Phi don ban ong eiei?