Bah Monarch Shabong
Ha ka jingiakhun ia kane ka khlam Corona, ngi iohi, ba dei tang U Ma Lahkmen Rymbui, u myntri kam poh iing bad U MLA jong ka Amlarem, u bym treh ban buhrieh ia ki jingshisha.
Halor kane ka mat, ki heh jong kane ka sorkar, ki ia buhrieh khop ia ki kyrteng, ba kynthup ia U Conrad Sangma, Prestone Tynsong, AL Hek; hynrei u myntri kam poh iing, uba ju sei shabar ia ki kam runar bad hangne ruh u iathuh beit thik ia ki shnong jong ki 3ngut kiba pang ha ka Constituency jongu, ia ki dukan ba ki don, la ki dei ki dukan sha, ki dukan khap shniuh bad kiwei.
Lyngba katei ka jing shisha, kito kiba ju leit sha kitei ki dukan, ki la sngewthuh ban leit phah sumar kyrkieh ialade, ki la kynmaw mynno ba ki leit rung ha kitei ki dukan bad kumta ter ter bad katei ka dei ka lynti ban iakhun ia ka khlam corona, ha kaba ym donkam ban leit wad ia u nongpang, hynrei, u nongpang, un leit hi sha ki jaka sumar, namar ba ym don uwei ruh uba kwah ban iap ne ban pang. U myntri rangbah ba ar, ha ki khyndiat sngi ba ladep, u kynnoh ba ka Congress, ka kren politiks, haba ka kwah ban tip ia ki kyrteng jong kitei kiba pang khlam corona; hynrei ka jingleh jong u myntri kam poh iing, ka la biang bad ka la shai kdar bad u paidlang ka Amlarem, ula dei ban thab kti, ban tied shamoit ne tied pliang, kum ka jing ai khublei ia U MLA jongki, uba hok bad uba shai.
Ka jingai jingtip jong U MLA ka Amlarem, khlem pep, kin don ki ban ong, ba u pynbudnam ia ki nongpang, ba u pynsniew iew ia kitei ki dukan jong kitei ki lai ngut, hynrei u myntri, u sngewthuh ba ha syndah jong kitei ki laingut, ki don da ki phew bad ki spah ngut, ki ban pyn saphret ia katei ka jingpang bad kumta, ka bha ba iathuh ia ki lai ngut, ba kin nym iap sa ki spah ngut kiwei pat.
Ha Shillong, haduh mynta, ngim tip, haei ki sah ki nong iathoh, kiba la pynkhein ia ki ain jong ka sorkar Jylla, ngim tip, ia kiwei pat kiba ioh pang ruh, ki sah haei bad ngi shu tip toi, ba don ka jingkhang shnong, ha ki katto katne ki bynta jong ka nongbah bad lait nangta, ngim tip eiei shuh satia.
Ka jing ai khublei, ka leit namarkata sha u myntri kam poh iing ka sorkar Jylla bad nalorkata, ka don sa kawei ka phang bad kata ka long ba ki trai shnong jong ka thain Amlarem (khlem da ap ia ka sorkar) ki dei ban ia tih tyllong khohreh, naei ka wan mih katei ka jingpang iabit, namar ba kiba ioh ia ka, kim dei kiba shang shnong bad katei ka dei ka bynta kaba sngewkhia shi katdei bad ka donkam ia ka jubab kaba kyrkieh.
Phi don ban ong eiei?