Sha Williamnagar, la set phatok ia u nongialam FKJGP

Shillong,24 Risaw:
U Bah Eldie Newton Lyngdoh uba long u Public & Information Secretary ka FKJGP, Central Body , u dei u nongialam sengbhalang ba nyngkong eh ba la shah pynngat hapoh ka kyndon MPDA ha kine ki sngi ba jur ka ia khih ILP bad la pynkynriah ia u sha Williamna gar District Jail ha kane ka sngi nyngkong ba la lah. “La pynkynriah ia u sha Williamnagar ha kane ka sngi nyngkong kaba lah” ong u Bah M Kharkrang SP ka East Khasi Hills haba kren sha ki nongthohkhubor.
Haba la kylli na u SP halor ka jingpynngat MPDA ia utei u nongialam sengbhalang u la ong ( SP),ba la pynngat ia u hapoh ka MPDA namar ki jingdonkti ha ki kam pyntriem kum ki jingthang kali, pandal Puja bad kiwei, u SP u la ong ba lehse ka lah ban dei ba u khlem leh da lade hynrei u don ka jingkitkhlieh lada kiwei ki leh kiba long ruh lehse ki jingkynshoit na ki ban phah leh da mano re, ong u Bah Kharkrang.
Shuh shuh ki nongthohkhubor ki la kylli na u SP, ba kumba long mynta ki pulit ki dang thwet ia kiwei pat ki nongialam sengbhalang ban kem, hato lada ki ioh kem ia kitei ruh yn pynngat hapoh ka kyndon MPDA, “Nyngkong ngin kem shuwa ia ki bad sa ia peit pat hadien” jubab u Bah Kharkrang. Kham hadien u Bah Kharkrang u la ong ba ki pulit ki thwet ban kem tang ia ki nongialam sengbhalang kiba donkti ha ki kam pyntriem bad ki kam pynjot pynpra kum ki jingthang ophis, kali, kawang petrol bomb bad kiwei kiba la jia ha kine ki sngi hynrei ia kito ki bym leh ia kitei ki kam ym shym la kem ia ki. “Ki don kiwei pat ki nongialam sengbhalang kiba iaid tawiar ha Secretariat ruh , ka kong Agnes Kharshiing ka iaid tawiar ka Secretariat ngim kem ia ka, tang kiba donkti ha kitei ki kam kin shah kem” bynrap biang u bah Kharkrang SP East Khasi Hills.
Kum ban shu pynkynmaw, ba ki pulit ki la kem ia u Bah Eldie Newton Lyngdoh, Public & Information Secretary ka FKJGP Sengkmie ha ka step pyhrngap jong ka 11 tarik mynta u bnai na kawei ka Pham kaba don ha Umsning, dakaba kynnoho ba u la donkti ha ka jingkawang petrol Bomb ha kawei ka Pandal Puja. Na ka liang jong ki pulit ki la pynngat ia utei u nongialam sengbhalang ha ka mukotduma number 162 10) 13 hapoh ki section jong ka IPC sec 447, 436, 511, 153A ( 2)/ 34 nalor ka sec 8A jong ka MMPO Act 2010 bad mynta pat la pynngat ia u hapoh ka MPDA bad la pynriah sha Williamnagar District Jail.
Kham hadien u nongthohkhubor u la pyrshang ban ia kren bad ki bahaing hasem jong utei u nonilam sengbhalang ha kaba na ka liang jong ki ruh ki shu tip ba la pynkit ia u sha Williamnagar katba kim don jingtip pat la ki pulit ki la set ia u ha along paidbah ne ha kano ka jaka.