Nongpoh: Ha ka por ba ki dkhot ka HNYF, 20Mer Circle, ki la leit ban khynra ia ki kot ki sla jong ki bar jylla, kiba la wan ban khlong Shyiap na Wah Umtrew kaba don ha shnong Lailad ha Ri Bhoi, la iohi ba ki don ki bar jylla kiba la phet krad ialade da kaba rynsied sha katei ka Wah heh bad jngi sha shilliang, tang ban lait na ka kti jong kitei kiba la leit ban khynra.
Ki bar jylla kiba la jngi sha shilliang ka Wah Umtrew ha ka por ba khynra ka HNYF
Ha kaba leit khynra sha katei ka jaka, ki dkhot ka HNYF, ki la lap ba kitei ki bar jylla kiba la wan ban bylla khlong Shyiap na katei ka wah, kim shem la don ia ki kot ki sla kiba biang, hynrei ki don tang katto katne ngut kiba la lah ban pyni tang ia ka Pan Card bad ki Dur Epic.
Ha kane ka jingleit khynra bar jylla, kaba la ialam da u Bah Paul Wahlang, President ka HNYF, 20 Mer Circle, ha ryngkat ka jingdonlang u Bah Iaineh Wahlang, Organizing Secretary ka HNYF, Northern Region lem bad bun ngut ki dkhot ka HNYF, ha kaba ki la leit ban khynra ia baroh ki jaka sei Shyiap kiba don ha katei ka jaka bad bun na kitei ki jaka sei Shyiap la pyntrei tang da ki bar jylla suda.
Ha katei ka jingjurip, hadien ba la lap ia kitei ki bar jylla ki bym don kot don sla, ka seng ka la maham tyngeh ia kitei ki bar jylla, ba ki dei ban mih noh na katei ka jaka bad ba ki dei ban pynbiang shwa ia ki kot ki sla.
Haba kren sha ki nongthohkhubor, u Bah Paul Wahlang, u la ong ba ka seng hi ka sngewkhia ban iohi ia ka jingioh laitlan ki bar jylla ban wan rung shapoh ka jylla, wat haba kim don ia ki kot ki sla kiba biang, hynrei haba iadei bad kane, ka seng hi kan nym shong kli kti, pynban kan dang iai bteng ba khynra ia ki bar jylla ki bym don ia ki kot ki sla.
Na ka bynta ban tehlakam ia ka jingwan rung kyrthep ki Mynder, kiba la wan ban bsuh khlieh sha ka jylla da kaba trei ha ki kam bapher bapher, na ka liang ka seng ka kyntu ia ka sorkar ba ka dei ban pynstet noh ha ka ban shna ia ka Entry bad Exit point, khnang ban tehlakam ia ki bar jylla kiba la sdang ban rung wat ha ki kyndong kynshrot, u la bynrap.