Sha U Modi ujor ka MPF, pyrshah ia ka sorkar u Mukul Dawa tohkit NIA, ba iadei U Mukul bad ki senglehnoh

Shillong,3 Naitung:
Ha kine ki khyndiat sngi ba la dep, ki nong ialam ka liang pyr shah kiba don ha ka lama jong ka Meg ha laya People’s Front, ba kynthup ia ka UDP, NPP, GNC bad ki MLA shimet ki la her sha Delhi na ka bynta ban ia kynduh kyrpang ia u Myntri Rangbah Duh ka Ri u Narendra Modi bad ha katei ka jingiakynduh ki nongialam ka liang pyr shah ki la ai ruh ia ka shithi dawa (Memorandum) sha u Modi.
Ha ka shithi ba ka la phah sha u Modi la soi da u nongialam ka liang pyrshah uba dei ruh u Chairman ka MPF u Dr. Donkupar Roy bad u Secretary ka MPF u James K Sangma. Ha katei ka shithi sha u Modi ka MPF, ka la pynsngew ia ka jingdkoh ka sorkar u Dr.Mukul Sangma ha kane ka jylla. Ki la thoh kumno ba ki seng lehnoh ki la nang kharoi ha kane ka jylla, wat la ka HNLC bad ka ANVC ki la troin.
Ka MPF ka la pynpaw ha u Modi ba kam don jingshaniah ia u Myntri Rangbah ka jylla bad ka la kynnoh ba u dei u nongsain pyrthei uba ia donkti lang bad ki seng lehnoh khamtam bad ka ANVC-B, bad ia kane ki la shim lyngba ka jingiadei ba ia jan bha jong u Champion Sangma bad u Dr.Mukul Sangma, kaba utei u heh pulit uba la seng ia ka kynhun lehnoh ka GNLA u la ju ialap elekshon na bynta u Dr.Mukul ha u snem 2008 bad ruh u la pynpaw ba u kyrshan Congress ha kane ka elekshon MLA 2013, wat la u don hapoh along.
Ka kynhun ki liang pyrshah ki la kdew ruh shaphang ki jingpyntriem kiba la jia ha ka jylla ba kynthup ia ka jingdawa pisa ka jingshah rahbor, ka jingpyniap bad kiwei pat ki jingjia pyntriem, ka la kdew ruh ia ka jingshah pyniap u Ajaju R Marak, u Political Secretary ka ANVC-B, kaba la jia tang shisngi hadien ba u la thad madan ia ka jingiadei u Dr.Mukul bad ka ANVC-B, kaba la ong ba ka jingshah pyniap utei u nongialam ki seng lehnoh ka dei namar ka pynsngap jar noh ia katei ka kam bad ba ki jingiadei ki riew sain pyrthei bad ki seng lehnoh kan ym paw pynryngkew.
Nalor kiba bun kiei kiei kiba ka MPF ka la kdew ha ka shithi ba la phah sha u Modi, ka la dawa ba dei ban phah tohkit ha ka NIA ia ka jingiadei u Dr.Mukul Sangma bad ki Seng lehnoh khamtam bad ka ANVC-B, ka la dawa ruh ban phah tohkit halor ka jingshah pyniap u Ajaju R Marak, tang hadien ba u la pynpaw sha ki kot khubor ia ka jingiadei u Dr.Mukul Sangma.