Sha U Lat, phah pynsangeh phiah Konstitwensi ka Jaintia hils

Shillong,12 Nohprah:
Ki Hynniew seng bhalang ryngkat bad ki nongialam shnong jong ki shnong bapher bapher ha Jaintia hills ki la leit ban ia kynduh ia u lat ka jyla u Dr.KK Paul ban pynsngew ha u ban pynsangeh ia ka jingphiah Konstituency ka JHADC da kaba kynnoh ba katei ka jingphiah konstitwensis ka dei kaba la mang tang na ka bynta myntoi shimet jongno re jongno. Kitei ki kynhun kiba pyrshah ia ka jingphiah Konstitwensi ki la pynher ruh da ka shithi sha u lat ka jylla ha kaba ha ka shithi ki la kyrpad sha u lat ba u dei ban pynsangeh ia kane ka jingphiah konstitwensi thymmai ka JHADC da kaba kynnoh ba katei ka jingleh ka JHADC ka long pyrshah ia kamon u paidbah.
Ha katei ka jingiakynduh bad u lat ki sengbhalang bad ki nongialam shnong ka Jaintia ki la kyntu ia u lat ban ai jingmut ia ka sorkar jylla ba kan pyntreikam ia ki juh ki konstitwensi barim ha ka ne ka elekshon MDC ka ban wan bad ki la ong ba donkam ban ia tai sanai bha ha ka Ing Dorbar halor ka phiah konstitwensi, namar ba bun ki jaka kiba shah ktah lada jia ba pyntreikam kumba la kdew da ka JHADC.
Lah ban pynkynmaw ba ka JHADC ka la pas ia katei ka Bil ha ka 12 tarik u naiwieng hadien ba ka komiti phiah konstitwensi ka la dep ban pynlong ia ka jingpynsngew paidbah bad katei ka bill mynta ka ap sa tang ka jingmynjur na ka sorkar jylla. Shuwa ba ka JHADC kan pass ia ka Bill, ka komiti ka la pynlong ia ki jingialang pynsngew paidbah ha kylleng ki jaka ka Ri-Lum Jaintia bad ha kiba bun ki jingialang ki paidbah ki ieng pyrshah ia ka tei ka jingthmu ban pynkylla thymmai ia ki konstitwensi MDC.
“Kiba bun hi ki paidbah kiba la wan sha ka jingialang kim pdiang ia ka tei ka bill ba ka JHADC ka la pynkhreh” ong u President ka Jaintia People Movement Forum (JPMF) u Mabeitlang Pohsngap haba kren sha ki nongthohkhubor. Haba kynnoh ba la pass ia katei ka Bill ha ka jingkyrkieh khlem kino kino ki jingjurip ia ki shnong kiba hap ha ki thain bad ki jaka bapher bapher. U la kynnoh ruh ba la wanrah ia ka tei ka bill sha u paidbah da ka jingleh donbor ha kaba ym shym la ailad ia ki paidbah ba kin ia aia jingmut lang halor katei ka phiah konstitwensi.
U President ka Synjuk Ki Rangbah Shnong (RKRS) na West Jaintia Hills u Kolmen Pohshna haba kren sha ki nongthohkhubor ha Shillong Press Club u la ong “Ngi dawa na ka sorkar jylla ba kan pynsangeh noh shuwa ia ka jingphiah konstitwensi ha JHADC namar kan ktah ia kiba bun ki shnong”.