Sha Supreme Court, ujor ka Amra Bangali, ban weng ia ka ILP na Manipur

Ka Supreme Court, ka la ai jingtip sha ka sorkar India bad kumjuh sha ka sorkar Manipur, halor ka mat jing pyrshah, ban pyntrei kam ia ka ain Inner Line Permit (ILP) ha Manipur.

Ki nong bishar, ba kynthup ia U Justice Abdul Nazeer bad U Krishna Murari, ki pan jingshai na ka sorkar India bad ka sorkar Manipur, halor katei ka mat, ha kaba la ai por saw taiew, ba kin jubab.

Ka seng Amra Bangali, kaba na Kolkata bad kaba don ia ka shnat trei kam ha Assam, ka la ujor sha katei ka kashari, ban dawa, ba dei ban weng noh ia katei ka ain ILP ha Manipur.

Katei ka jing ujor, ka pyrshah jur, ia katei ka jing ai bor ia ka sorkar jylla, ban kan khanglad ia ka jingrung jingmih jong ki briew, ki bym dei ki trai shnong lane ki bym dei ki nongshong shnong ba pura jong ka Manipur.

Lyngba katei ka hukum, kaba la pynmih ha u snem 2019, ka ILP, ka trei kam ha Manipur, Arunachal Pradesh, Mizoram bad ha ki district jong ka Nagaland bad la ong ba katei ka rai, ka pynkhein ia ki kyndon jong ki article 14, 15, 19 bad 21 jong ka riti synshar jong ka ri India, ong ka jing ujor.