Sha man ki Hima, yn leit ka komiti u Chairman KHADC

Shillong, 23 Naitung:
Ka komiti ba la khlieh da u lamphang ka KHADC u bah Mansturdy Nongrem kaba la tip kum ka ‘Advisory Committee on Khasi Customary Law’ ka la shong ia ka jingia lang ba nyngkong eh jong ka mynta ka sngi ha kamra u lamphang, ban pyrkhat na ka bynta ban pynlong ain ia ki riti ki dustur kiba ki Hima bapher bapher ki ju leh.
Ha katei ka komiti u bah Mansturdy Nong rem, Chairman KHADC u la long kum Chairman, u bah Gabriel Wahlang Dy. Chairman KHADC kum u Dy.Chairman, u bah M. Kharkrang, u ophisar ka KHADC kum u Member Secretary, ki dkhot katei ka komiti ki long u bah Fabian Lyngdoh, Chairman barim KHADC, u Dr.A.K Nongkynrih Prof. ka NEHU Sociology Dept, Maxmillan Byrsad u Lyngdoh ka hima Nongstoin, u bah A.Shangpliang Secretary Legislative ka KHADC, u bah R.S Wanniang Joint Secretary sha ka Executive Committee ka KHADC, bad u bah D.G Syiemiong, u ophisar ka KHADC.
Ha katei ka jingialang kaba nyngkong eh u bah Mansturdy u la iathuh ba ka komiti ka la shim ia ka rai ban pynsngewthuh ia baroh ki Hima ba ki dei ban pynlong ain noh ia ki riti ki dustur jong ki bad khnang ba ki Hima kin ym lut ksan u bah Man, u la ong ba katei ka komiti kan hiar hi sha manla ki Hima ban pynsngewthuh ia ki ryngkat ki jingkylli kiba katei ka komiti kan pynkhreh.
U la ong ba kumba long mynta 40 na ka shispah ki hima ki dei kiba la don ia ki ain hynrei kim don pat ia ki Rules jong ki lait noh ka hima Nongstoin, ka Hima Langrin bad ka hima Maharam. U la iathuh ruh ba ki la don ki Hima kiba la wan sha u, ban kyrpad ban leh noh kloi ia katei ka kam ha ki hima jong ki bad kitei ki kynthup ia ka hima Mawiang, Nobasohphoh, ka Nongpoh Sirdarship. U la ong ba ki don ki Hima kum ka hima Mylliem, Bhowal, Jyrngam bad kiwei kiba la don lypa ia ki ain hynrei kim don pat ia ki Rules.
U Chairman katei ka komiti u la ong ba ka daw ba u kwah ba ki Hima ki dei ban don noh ia ki ain la jong ka dei namar ba u iohi ba ha kane ka juk mynta ym lah shuh ban shaniah tang ha ka rukom leh (Practice) kaba ju leh baroh shi katta ia ka riti ka dustur hynrei donkam kyrkieh ban don noh da ka ain. U la ong ba ka rai ba ka High Court ka la pynmih ha 10 tarik u nohprah, 2014 ka dei kaba bha tam naba ka la pynkyndit thiah ia baroh ba kin shna noh da ka ain lajong, “Lah uba marwei uba don ain ia ki 100 ngut kiba khlem ain ha kane ka juk mynta” ong u bah Mansturdy Nongrem. U la ong biang ba ka jingdon ia ka ain bad ki rules jong ka Hima kan pynsuk ia ki Hima ha kaba u ai nuksa ba ka hima Nongstoin ka dei kawei na ki Hima ba ka rai ka High Court kam treikam satia.