“Sha lyndet ka pud ki Israel”

AIS Suja

“Ai ba yn pynkhraw ia u Trai sha lyndet ka pud ki Israel” Malakhi 1:5. U Prophet Malakhi u la thoh ia kane ka Kitab ha ki snem 450 BC haduh 425 BC. La thoh ia kane ka Kitab na ka bynta ka jaid bynriew Israel namar ka jaid bynriew ka dap da ki jingmane blei thaw ki jingbamsap bad kiwei ha ki liang baroh.

Kane ka Kitab ka kren ba yn pyniohpat ha ki Israel ia kaei kaba ki la duh ha ka met bad ka mynsiem, ki la duh noh ia ka jingsynshar ba hok ha la ka Ri. Ka sorkar ka la lehbein ia kiba duk ka la knieh ia ka hok u rangli u juki bad synshar lehmon ha ka Ri, ki paidbah ki mane ki bleithaw bad kyntait pat ia u Blei uba im.
Kumta kane ka Kitab ka kren ia ka pop ki Israel bad ban ai pat ka jingkyrkhu ia ki bad ia ka jingbishar bahok bakhuid. U Blei u la ieit ia ki Israel hynrei ki la kyntait pynban ia u Blei ba im, ki la leh sang pyrshah ia u Blei ki la kyntait ia ka Jutang hapdeng u Blei, ki la pynsngew sih jur ia u Blei. Malakhi 2:17.
U Esau u dei shipara bad u Jakob hynrei u Esau u la kyntait ia u Blei, u Blei u la ai ia ka bynta jong u ha ki myrsiang ka ri Khlaw. Ka Edom ka ong, la pynkyllon ia ngi hynrei ngin phai ngin tei pat ia ki jaka kynjah namar u Trai u la kren da kaba ong – “Kin tei hynrei nga ngan pynkyllon, yn khot ia ki ka muluk (ka Ri) ka jingbymman.
Hynrei hapdeng kine ki jingbymman, u Blei u la kular ban pyniohpat (restore) sa shisien pat ia ki Israel, hadien ka jingbishar bahok jong u Blei halor jong ki namar u Blei un pyndonkam ia ki Israel ha ki sngi bakhadduh bad ba ka pyrthei kan khmih phylla ha ki. Kumta la pynbna ia ka khubor jingkyrmen halor ki Israel baroh. La pynbna, ba ka sngi u Trai kan wan ha kaba u Trai un pynkhuid ia ka pop ki Israel ki Lyngdoh (Priest) bad ia ka Temple. Bad ia kane u Blei u la dep pynkhreh lypa na ka bynta uta u ban sa wan uba long u Trai ki Trai halor baroh. Kumta haba la dep ai ka jingkyrmen. U Blei u la phah ia la u nonglamktien (messenger) uba dei u Ioanis Nongpynbaptis. U Ioanis u la wan mih ban pynbna pyrthei ban pynkhreh ban pynkhraw ia u Trai ki Trai shaduh sha lyndet ki pud ki Israel (Beyond the Borders of Israel).
U Blei u la phah ia la u khun ha Israel hadien ki 400 snem ki snem jingsngapjar (Four Hundred silence years) bad hapoh kine ki por u Blei u la phah ia u Ioanis Nongpynbaptis iathuhlypa da u Isaiah shapahng u Jisu, bad kata ka ktien ba pyrta ha ri khlaw “Phin pynkhreh ia ka lynti bah u Trai, phin pynbeit ia ki lynti jong u” Mathaios 3:1-4.
Ka sngi u Trai ka la wan ha Israel bad ha ka pyrthei hi baroh kawei ba ia ka kyrteng u Trai yn pynkhraw na Israel (Jerusalem) bad sha lyndet ki pud ka Israel kein. Ka kyrteng Jisu la pynkhraw mynta ym tang ha Jerusalem hynrei sha lyndet ki pud ka Israel sha ki ri ka pyrthei baroh ba u Jisu u dei u Trai ki Trai u Syiem ki Syiem (King of Kings and Lord of Lords). Bad ka kyrteng Jisu ka dei ka kyrteng halor ki kyrteng baroh. “Ba ha kata ka kyrteng u Jisu ka khohsiew baroh kan ioh dem khrup ……. U thylliej un phla shynna ba u JISU KHRIST U DEI U TRAI” Philippi 2:10-11.
Shisha mynta ha ka pyrthei baroh kawei ka kyrteng u Jisu la pynbna, la tip, ym don ba lah ban khang, ong u Blei – “Ngan trei uei ban khang?” Isaiah 43:10-13. Ka kyrteng u Jisu ka iaid shaduh lyndet ki pud ki Israel bad ia kane ka jingiathuhlypa la pyndep, u Blei u la leh kiei kiei kiba thymmai ha Israel mynta bad ka la long ka por ba ki Israel kin ioh tip ia kane, ba u khun u Blei u la wan sha ka pyrthei na ka jaid Jiw ha Israel bad ka jingpynim ka long na ki Jiw (Salvation is from the Jews). Ioanis 4:22. Kan iaid sawdong ka pyrthei na sha lyndet ki pud ka Israel kein. U Blei u la pynkhreh ruh ia ka Israel mynta ban log ka tiar thma jong u ha ki por ban sa wan noh, bad ba ki Israel kin ioh tip ba u don u Blei ha Israel uba la wan na ka jaid Jiw kein. U Blei u trei u nang iai trei mynta bad ym don ba lah ban khang ia u.
Ka ktien jong u ka iaid bad ka trei na Jerusalem shaduh lyndet ki pud ka Israel ha ki ri ka pyrthei baroh, ba ka pyrthei kan tip ba u Jisu u long u Trai ki Trai. U Blei un pynkdor ia ka lynti ki bymman kiba ialeh pyrshah ia ka ktien jong u ha ki ri ka pyrthei. “Namar uei uba lah ban pynbeit ia kata kaba u la pynkdor?” Eklesiastis 7:13. Bad ym don hi ruh uba lah pynkdor ia kaba u la pynbeit. Ka ktien jong u kan trei bad iai trei kan ym phai thylli hynrei kan pyndep ia kaba u Blei u la kren. Isaiah 55:11.
Kumta la pynkhraw ia ka kyrteng u khun u Blei mynta shaduh sha lyndet ka pud ki Israel, ym tang ha Jerusalem ha Judia ne Samaria hynrei shaduh kiba kut ka pyrthei. Ki kam Apostol 1:8. Amen.