Sha ki thain Rambrai leit ia kynduh nongrep ka ICAR

Shillong,17 Nailur:
Ka Indian Council of Agricultural Research (ICAR) Umïam, lynti Umroi, ha ka 13 bad 14 tarik ka la hiar sha ka shnong Mawlieh, jan Rambrai kumba 15 k.m na Nong stoiñ, ban ia kynduh ia ki nongrep katei ka thain bad ban ioh ia phylliew jingmut bad ki ha kaba ia dei bad ka rep ka riang kumjuh ruhki jingri jingdup ha katei ka thain. Ka ICAR ka la leit ban twad jingmut na ki nongrep ban hikai bad pynrung ïa ki buit thymmai kiba kham bha bad ïadei bad ka rep ha kane ka thaiñ ba ka la lap lyngba ka jingwad bniah jong ki stad saiantis jong katei ka tnad. Ia kane ka kynhun jong ki hikai saian ka ICAR la ïalam da u Director jong ka, u Dr. S.V Ngachan.
Ka jingthmu ba kongsan jong katei ka tnad na ka jingleit tur sha ki nongrep ha nongkyndong ka long- ban hikai, kdew lynti da ki buit thymmai ban rep, ri jingri bad kumno ban pynlong dor ïa ki jingmih na ki mar-rep ban kham ïaid-dor ïaid ïew; ban kyntiew bun shah ïa ka jingpynmih jong ka rep ka riang, ban kyntiew shuh shuh ïa ka ïoh ka kot bad kane hi kan kha bun ki kam na ka bynta kiba khlem kam khlem jam, khamtam ïa ki samla.
Khnang ba ka rep ka riang bad ka ïoh ka kot kan kiew, khnang ba yn lah ban pynkha bun ki kam ki jam, ka ICAR ka la pynshai ba donkam ban pynkhleh lang ïa ka rep ka riang bad kiwei kiwei ki kam kiba ïasnoh lang bad ka rep kba, rep riewha dem, rep Raishan, Soh riew, Jhur, ki soh ki pai ki dei- kum ka ri Masi, Muid, Sniang, Rabbit, Syiar, Turkey, Emu, Han, Doh kha bad kiwei kiwe de bad da katei ka buit lada sniew u kba u riewhadem, la khyllie noh na ka rep jhur rep soh bad ri jingri. Kane ka wanrah ïa ka jingshngaiñ bad pahuh ka bam ka sa bad ka ïoh ka kot jong ki nongrep, khamtam kito kiba dang tlot ha ka jingïoh.
Ia kane ka prokram ïasyllok la pynbeit da ka seng Pisci-Agro and Eco-Tourism Association (PAETA) kaba na kane ka shnong bad kumba 50 ngut ki Nongrep ba la jied kyrpang da kane ka seng, ki la ïoh bynta. La synrop lang ban ai jinghikai ha kane ka prokram da ka Krishi Vidyan Kendra (KVK), West Khasi Hills hapoh ka jingïalam jong i Kong Marianna Dkhar, KVK Co-ordinator.
Ha ka sngi pynwai la sam-ei ïa ki symbai jhur bakynsai, ki symbai dohkha bad ki than plastic ban siang na trai pung ban pynlang um slap (Agri polythene sheets) ban shna Jalkund sha ki nongrep da u ICAR Director, Dr. Ngachan.