Sa 76 ngut kiba ioh pang covid hynnin ka miet ha Assam bad baroh kiba ioh pang, ki la poi sha ka 2,473.
U Himanta Biswa Sarma, myntri ka koit ka khiah Assam, u pyntip hynnin ka miet ha ka por 11.35 baje mynmiet, ba kitei kiba ioh pang shuh shuh, ki dei na ki phra tylli ki District bad ka Dhubri, ka don 23 ngut, ka Darrang 22ngut, ka Kamrup Metro 12 ngut, ka Dibrugarh 7ngut. Nangta sa 5 ngut na Barpeta, 3 na Dhemaji bad mar ar ngut na Sonitpur bad Bongaigaon district.
Haba khein lang baroh kiba ioh pang hynnin ka sngi, ki la poi sha ka 230 ngut; nangta haduh hynnin ka sngi, ki la don ruh 588ngut ki nongpang, kiba la mih na ki jaka sumar bapher, hadien ba ki la jem na ka jingpang Covid 19 bad tang ha ka sngi saitjain, la pyllait noh ia 79ngut na ki jaka sumar bapher ha ka Jylla. Ka Covid, ka la shim ia 4 ki mynsiem briew ha Assam.
Ha Arunachal Pradesh, ki don sa arngut kiba ngat ha katei ka khlem hynnin ka sngi saitjain bad baroh ki la poi sha ka 49ngut ha katei ka Jylla.
Ka Tripura, ka nang kiew na katei ka jingpang, ha kaba ki don sa 55ngut kiba ioh pang covid 19 ha katei ka Jylla bad baroh kiba ioh pang, ki la poi sha ka 750ngut. U Biplab Kumar Deb, myntri rangbah ka Jylla, u iathuh ha ka tweet jongu, ha ka por 10.45 hynnin ka miet, ba ki don 55 ngut kiba dang shu ioh thymmai. Kiba bun na kitei kiba ioh ia katei ka jingpang, ki dei kiba wan na shabar, ong U Deb.
Phi don ban ong eiei?