Sha ka 20 percent pynkiew khajna ka sorkar halor u duma

Shillong, 10 Nohprah:
Ka kynhun Myntri kaba la shong jingialang mynta ka sngi, ka la shim ia ka rai ban kyntiew ia ka khana halor u duma kata na ka 13.3 sha ka 20 percent.
Na kane ka jingkyntiew khajna ia u duma, ka sorkar ka khmih lynti ban ioh lum pisa tam kumba T.15 haduh T.20 lak.
Ha kawei pat ka liang ka sorkar kam shym la pyntreikam satia ia ka hukum jong ka Supreme Court ban niew be-ain ia u Gutka uba dei uwei pat na ki jait duma kiba la die ha ka Nongbah Shillong.
U Mukul Sangma Myntri Rangbah u la ong ba ka don ka jingbym pat shai halor kane, kumta yn sa shim ia ka rai kham hadien.
Ha kawei pat ka liang ka sorkar ka la rai ban thung ia u Chief Technical Advisor na ka bynta ka Meghalaya Electric Corporation Limited (MeCL) kaba dei na ka bynta ka technical wing.
Shuh shuh ka sorkar ka la mynjur ruh ia ka draft halor ka ain na ka bynta ba ki skul kin hap ban pyniasoh bad ka Meghalaya Board of School of Education (MBoSE) ka ban long katkum ka Meghalaya Board of School Education Act, 1973.
Ha kane ka jingialang jong ka kynhun Myntri mynta ka sngi na ki 12 ngut ki Myntri ki la don tang 6 ngut ki Myntri sorkar kiba lapoi sha kane ka jingialang kynthup ia u Myntri Rangbah.