Sha Haryana yn leit ia kura ki 2ngut ki heprit na Shillong, noh synniang ka HANM

Shillong: U wei heprit, uba la tip kyrteng kum u Wanlambok Shynret u ba dang 14 snem karta, bad u dei uba pule ha ka skul San Shnong Secondary School, u dei u khun jong i kong Barilin Shynret bad u bah Issac Bareh, na ka shnong 3 Mer u la mih naka nongbah bad na la ing myn ha ka 28 tarik uJylliew ban leit ia khun ha ka rynsan ia kura ka ban long naduh ka 2 tarik u naitung haduh ka 8 tarik u Naitung ha ka jylla Haryana.
Un leit ban ia shim bynta ha ka rynsan kaba la tip kum ka BF1 1st Sub Junior Boys National Boxing Championship ka ban long ha Rohtak , Haryana bad un mihkhmat ia kane ka jylla na ka Boxing Association East Khasi Hills.Nalor u Wanlambok don sa uwei pat u heprit u ban leit lang ban iakhun ha ka category 33 kg haduh 35 kg uba la tip kyrteng kum u Bankhmihlang Lyngdoh Nongpyiur. Yn synran ia ki sha Haryana da u coach jong ki u Nine Sing Kharlor.
Shuwa ba u heprit Wanlambok un mih na la ing, ka HANM Upper Shillong Circle ka la leit ban ai khublei kitbok kitrwiang ia utei u heprit ryngkat ka jingiarap da ka pisa kum ka dak ban iarap ba un ioh bai lynti. U President ka HANM u bah Samkupar Tron bad u Secretary u bah Kyntiewborlang Tron ryngkat ka jingdonlang ka kong Nisha Syiemlieh ki la leit sha ing jong utei u heprit ryngkat ki kyntien kitbok kitrwiang.