Set phatok beain, ka sorkar ia U Bah Reginal, ong u nongiasaid ain

Shillong, 16 K’lyngkot:
Ka kynrum kynram ka la mih halor ka jingset phatok beain ia u nongia lam ka FKJGP, U Bah Reginald Ronald Thabah.
U nongiasaid ain jong u Bah Thabah, u Sunil Agarwal haba pan jamin ia une u nongialam ka FKJGP na u Chief Judicial Magistrate uBalram Joshi ha kane ka sngi Palei, u la ong ba u Bah Thabah u la shah set phatok beain naduh ka 20 tarik Nohprah hadien ba la weng noh ia ka jingpynngat ha ka ain MPDA.
“Ia u Bah Thabah la dei ban wanrah sha Shil long District Jail na Williamnagar wut wut hadien ba la weng ia ka jingpynngat ha ka ain MPDA. Ka la paw shai ba ka hukum ba la weng ia ka MPDA ka long kaba mardor”, la ong u Agarwal haba iasaid nia ha ka jingpan janmin.
Ia u Bah Thabah la pynngat ha ka ain MPDA, hynrei kham hadien la pynlait noh hadien ba la ai jingmut u Lat hadien ba u la leit ban ai jubab ha ka Advisory Board kaba bishar ia ka kam jong ka MPDA.
U Agarwal u la ong ba ia u Bah Thabah u la dei ban wanrah sha Shillong Shillong District Jail ha ka 20 tarik Nohprah.
“Hynrei la wanrah ia u sha Shillong District Jail haduh ka 7 tarik Kyllalyngkot. Ym tang katne, ki bor ba dei peit jong ka phatok ki la dei ban wanrah ia u Bah Thabah wut wut sha ka Kashari hadien ba la wanrah shane. Hynrei ki bor ka phatok kim shym la leh ia kane, bad ki la rah ia u haduh ka 15 tarik Kyllalyngkot,” la ong u nongiasaid u Bah Thabah.
U la ong ba u Superintendent (Jail) u dei ban shim ia ka jingkitkhlieh halor kane ka jingleh ban set phatok beain ia u nongialam ka FKJGP haduh 25 sngi.
“Nga sngew ba ka sorkar ka dei ban siew bailutksan ia u Bah Thabah halor ka jingleh torti jong ki bor ba dei peit”, la ong u Agarwal.
U Agarwal u la ong ba u nongialam ka FKJGP u dei hok ban ioh jamin halor ka nongrim ba u la shah set phatok beain bad ruh ka jingbym lah jong ki pulit ban ujor eiei wat hadien ba la shong phatok haduh 90 sngi hadien ba la kem ia u.
Hynrei u CJM u la kyntait ban ai jamin bad u la pan shwa ia ka rekod jong u Thabah. Kham hadien, u Agarwal u la ong ba u la thmu ban leit ujor biang sha ka Meghalaya High Court pyrshah ia kane ka jingset phatok beain ia u Bah Thabah.