Seisoh ka jingiakhih ka KJBWA, lah ban hiar dor ka doh masi

Shillong, 08 Rymphang: Ka jingiakhih jong ka seng ki nongotdoh masi, ka Khasi Jaintia Butchers Welfare Association (KJBWA), lah ban ong ba ka la seisoh, ha kaba ka jingkhaii bad shalan tuh ia ki masi sha Bangladesh, ka la kynjah jar ha kine ki sngi.
Katkum ka jing iakren bad u Vice President ka KJBW, u Bah Generous Warlarpih mynta ka sngi, u la ong ba lada ka jinglong jingman, ka iai neh, ha kaba kam don shuh ka jingpyniaid tuh ia ki masi sha Bangaladesh, ka don ka jingkyrmen, wat ka dor ka  doh masi, ruh, ka lah ban hiar bad lada long ha kata ka dur, kan long ka jingiarap ia ki paidbah nongbam doh masi.
Ka KJBWA ka la sangeh thied bad sohdoh haduh ar taiew kynthih ha kine ki sngi, ban pynpaw pyrshah ia ka jingbym leh eiei ki pulit bad ka Hima Mylliem, ban tehlakam ia kane ka jingshalan tuh ia ki masi sha Bangladesh.
“Ka jingiakhih jong ngi ar taiew, ka seisoh, bad mynta ym ioh jingtip shuh ba don ka jingshalan tuh ia ki masi sha Bangladesh, naduh ba ki pulit ki la shim khia ban kurup 126 tylli ki masi ha u bnai ba la dep”, la ong u Bah Warlarpih.
Hynrei, na ka liang u Vice President ka KJBW, u la ong ba ia mynta, ka dor ka mur ha iew die masi ha Khanapara, ym pat sngewthuh sngewthaw bha, hynrei ka kham biang haba ianujor bad ki por mynshwa.
“Ngi kyrmen ba kan kham bha ha kine ki sngi bad lada ka biang, wat ka dor doh masi, ruh lah ban kham hiar”, la bynrap biang u Bah Warlarpih.
Ka jingiakhih jong ki shohdoh masi, ha kine ki sngi, ka la seisoh ha kaba la pynlong ia ki pulit ban shim khia ban khang lad ia ki nongshalan tuh ia ki masi bad, wat ki myntri ka Hima Mylliem ka la leit  ban jurip sha ka iew die masi ha Khanapara, Ri-Bhoi.