Shillong: U CEM ka KHADC u bah H.S Shylla u la sei ia ki kot ki sla ban pyntikna ba la pynkut noh ia ka jingthmu ban tih Uranium ha kane ka jylla. U la ong ba u la thoh sha u myntri ka tnad DoNER u Dr.Jitendra Singh ban pynpaw ba u pyrshah bha ia ka jingthmu tih Uranium ka UCIL ha kane ka jylla bad u la ioh ia ka jubab na ka sorkar India ba ka sorkar kan ym lah ban tih Uranium jubor lada khlem ka mon jong u paidbah.
U bah shylla u la ong ruh ba ka District Council ka la dep shim ia ka rai ha ing dorbar ban pyrshah ia ka jingtih Uranium bad u kwah ba ka ing dorbar thaw-aiñ jong ka jylla ruh kan shim ia ka rai rangbah ban wanrah da ka rai kaba skhem ban pyrshah beit ia ka jingtih Uranium ha kane ka jylla.
U bah Shylla u la ong ba kaba pynlong ia u ban kren ia kitei ki mat ka dei namarba bun kiba pynsngewthuh bakla ia u paidbah da kaba pyntieng ia u na ka daw ka ishu Uranium kaba la jia ruh ha ka elekshon 2018 kaba u la shah kynnoh ha ki kyrtong liangpyrshah halor katei ka mat Uranium.