Sei noh ki Muslim ia ki pisa na Bank, ba ki tieng ia ka NPR bad ka KYC

Chennai: Da ki spah ngut ki Muslim, kiba shong ba sah ha ka shong Nagapattinam District jong ka Tamil nadu, ki la weng noh ia baroh ki account jongki napoh Bank, namar ba ki sheptieng her, ia ka jingthmu jong ka sorkar India, ban pyntrei kam ia ka National Population Register (NPR) bad ha kaba kin duh noh ia baroh ka pisa jongki hapoh Bank.

Katei ka jingjia, ka dei ha ka shnong Therizhandur bad la pyni ia ka video ba ki trai shnong, ki iakren bad ki bor pyniaid jong ka Indian Overseas Bank (OB), ha kaba katei ka Bank, ka la bthah ia ki, ba kim dei ban sei noh ia la ka jong ka pisa na Bank bad U Branch Manager, ula batai ba ka jing aiti ia ki kot ki sla shapoh Bank, kan nym donkam than satia bad ba ka pisa jongki, ka don jingshngain hapoh Bank.

U Jamath, uba peit ia katei ka shnong, u ong ba ki Muslim, ki don ha ka jingsyier mynsiem kaba khraw, hadien ba la pyntrei kam ia ka ain Citizenship Act, namar ba ki tieng ioh ki duh noh ia baro ka pisa jongki. “Ngi iohsngew ba ki Bank, ki kwah ban pyntreikam da ka NPR, ha ki account lane kaba ki ong KYC (Know Your Customer) list. Kumta ngi tieng ioh ngi duh noh ia la ka jong ka pisa bad ngim tip ruh ia kiei ki kot kiba donkam ban pyni ia ka jinglong trai shnong jongngi bad kumta ngi la rai ban sei noh ia la ka jong ka pisa kaba don da ki bun bun snem hapoh Bank” ong U Jamath uba peit ia ka Haja bad ula ong ba kiba bun ki nongshong shnong ki rit mynsiem, namar kim don ia ki kot ki sla, ban pyni ia la ka jong ka jinglong nongshong shnong.