Sei madan ia ka kaiphod Mookhep, lane mad jingiakhih:JAC

Shillong, 9 Rymphang:
San tylli ki kynhun sengbhalang na Jaintia hills mynta ka sngi ki la buh por hynniew sngi ia ka sorkar u Mukul Sangma ba kan sei madan ia ka kaiphod jingtohkit halor ka jingshah siat iap arngut ki briew ha Mookhep ha ka 24 tarik Nailur 2014 lane kin pynlong ia ka jingiakhih ba khlem buh por.
Ki sengbhalang ki la byrthen ruh ba lada ka sorkar jylla kam pyn shitom ia kito ki pulit kiba donkti ha kane ka jingsiat iap kin dawa ban tohkit noh da ka CBI.
“Ngi dawa ba ka sorkar jylla kan ai ia ka kaiphod hapoh ka hyn niew sngi,”la ong u President ka Ri Jaintia Youth Federation (RJYF) u bah RK Rymbai haba kren hynne ka sngi sha ki nongthoh khubor.
U President ka RJYF u bah Rymbai u la ong ba ka seng kam banse ban pynlong da ki jing iakhih lada ka sorkar kam lah ai ia ka jubab halor ka jingdawa jong ki.
Ia kane ka jingtoh kit la khlieh da u Additional District Magistrate (ADM) ka West Jaintia hills u bah SS Syiemlieh shisngi hadien kane ka jingjia. Ka sorkar ka la bthah ia u bah Syiemlieh ba un tohkit halor kane bad ba un aiti noh ia ka kaiphod hapoh ka laiphew sngi hynrei kane ka laiphew sngi kaba la kut ha ka 30 tarik Risaw, 2014 hynrei ka sorkar ka la pynjlan biang sa shiphew sngi hadien kane bad ka la kut noh ha ka 11 tarik Naiwieng 2014 pynban ka sorkar kam pat shym la sei madan ia kane ka kaiphod hauh mynta.
Arngut kiba khlad ha katei ka jingshah siat ki kynthup S Phawa bad D Siangshai ha ka por ba ki iakhih ia ka jingkhang tih dewiong jong ka NGT.
U President jong ka HANM u bah Shaniah Suchen u la ong “ngi pdiang ia ka jing tohkit jong ka sorkar pynban ka sorkar kam shym la sei madan ia kata ka kaiphod bad kane ka jingleh ka sorkar ka la pynsah umdum ia ki paidbah”.
Kine ki seng ki la ong ba ka jingleh ka sorkar ka long kumba ka pyrshang ban buhrieh eiei na ki paidbah da kaba pynslem ban ai ia ka kaiphod. “Kane ka jingbuhrieh ka sorkar kumne ka long kumba ka kwah ban iada ia ki nongleh beain.”
Katkum ka jingong u bah Suchen, ka jingdawa jong ngi ka long ba lada lap ba ka jingtohkit ba ki pulit lane ki magistrate ki donkti ha kaban siat ia kine ki arngut ki briew, kin ioh ia ka jing pynshitom da kaba beh kam syndon bad dei ban pynngat ia ki hapoh ki kyndon jong ka Arms Act.