Sei lut ia ka pisa ban tei iing skul, ieng tang u maw nongrim

Shillong, 13 ’lyngkot:
Ka HYC Umpung Area ka la kam ba ka la lap lyngba ka Right To Information (RTI) ba ki bor pyniaid ka MG Snaitang LP School ki la pyndon-kam bakla ia ka pisa ban shna ia ka iing skul ha Mawshaliah, kaba hap ha South West Khasi Hills.
Mynta ka sngi, ka Hynniew-trep Youth Council Umpung Area Unit ka la jurip ia ka skul MG Snaitang Lower Primary School kaba don ha ka shnong Mawshaliah, Ranikor C&RD Block, West Khasi Hills District bad lap ba ki bor pyniaid jong ka Managing Committee jong kane ka skul ka la pyndonkam bakla ia ka pisa kaba la mang ban tei ia ka ing skul ba thymmai jong katei ka skul kaba la kot sha ka T. 6,67,500.
Hapoh ka jingialam u President ka HYC u Bah Batkupar Wanniang , ki la shem ba ia u maw nongrim ba pyni ia ka jingdep shna ia kane ka skul kaba dang shna malu mala hynrei la pynkynriah bad pyndait pat ia u ha ka ing skul barim kaba don marjan.
Katkum ka RTI la pyni ba ia ka pisa baroh la dep sei lut lai sien ha ka kyrteng jong u President ka Managing Committee ka skul u bah Founder Khardewsaw bad u Secretary u bah Garlanton Wanniang, kiba dei ruh shi khun shi kpa. Ha kane ka jingleit jurip, ka Seng ka la sngew khia halor ka jingpyrshang tep eit miaw ia ka kam bam sap ia kane ka mang tyngka na ka Scheme jong ka Sarva Shiksha Abhiyan katkum ka work order ba la soi da u Bah CS Tariang, State Co-Ordinator Civil Works, SSA-SEMAM.
Ka la pynrem jur ia kane ka jingleh buit tuh jong kitei ki shi khun shi kpa ryngkat ki baha ing ha sem jong ki hi kiba dei ki dkhot jong ka Managing Committee. U Bah Batkupar haba kren sha ki nongthoh khubor u la pynpaw ba kane ka jingpyndonkam bakla ia ka pisa dei ban tohkit da ki bor pyniaid ka SSA bad ieh ha ka jingstad jong ka ban nym ailad ia kum kine ki kam bam sap.
“Ka long kaei kaei ka ba sah lyngngoh ba ia u maw nongrim la weng na ka skul kaba thymmai kaba dang shu shna malu mala bad pyndait pat ia u ha ka ing skul kaba rim kaba la don lypa”, la ong une u samla u ba la pynpaw ruh ba ka Seng ka pynrem jur ia kane ka kam thok shukor jong ki bor pyniaid ka Managing Committee.
Ia kane ing skul ka bym pat pyndep lut hynrei katkum u maw nongrim bad ki kot ki sla la kdew bad pyni ba la pyndep ha u bnai Nailur jong u snem 2014. Ka HYC Umpung Area Unit ka kyntu ruh ia ki bor pyniaid ka SSA ban shim khia halor kane ka bynta. Ka HYC ka la kynnoh ruh ba ki bor pyniaid jong ka Managing Committee kim shym la bud satia ia ki kyndon katkum ka Work Order ban shna ia ka Ing Skul.