Sei ki nong mihkhmat T.9lak, ban iarap ia ki nongtrei ka koit ka khiah

Nongpoh: Kan dei kawei na ki kam nohsynniang, kaba ym ju kham da iohsngew koit ha ka jylla, ba ki nongmihkhmat kin sei na la ka jong ka pla ia ka pisa kaba T. 9 lak tam, kata na ka bynta ban iarap ia kino kino ki briew, kiba kynduh jingeh bad khamtam eh ha kaba kum kane ka por jong ka jingshah lynshop ha ka khlam COVID-19.

Katei ka kam nohsynniang da ka pisa, la pyni nuksa da arngut ki shipara, kata u Bah Jason S. Mawlong bad ka Kong Macdalyne S. Mawlong, kiba dei ki MLA bad MDC na Umsning Constituency, ha kaba ki la lah ban nohsynniang da ka pisa kaba T. 3000 sha ki 305 ngut ki nongiarap ha ka koit ka khiah, kiba kynthup ia ki ASHA, ki nongtrei Anganwadi bad Helper, haba khein lang sha ia katei ka pisa ka la kot haduh T. 9,15,000 Lak.

Ia katei ka kam ban nohsynniang sha kitei ki nongtrei ka koit ka khiah kiba hap ha Umsning Constituency, la pynlong ha Umsning Patarim, na ka bynta kito kiba hap ha ka Umsning C&RD Block bad ha Saiden, na bynta kito kiba hap ha ka Umling C&RD Block.

Kitei ki nongmihkhmat ka Umsing, ki la ong ba ia katei ka pisa ban ai sngewbha sha ki nongiarap ha ka koit ka khiah, ki la shu iasei hapdeng jong ki kiba dei ruh shipara, kata hadien ba ki la sngewkhia eh halor ka jingeh kaba la kynduh da ki nongtrei ka koit ka khiah, namar ki long kiba trei shitom watla ki ioh ia ka jingsiew kaba khyndiat eh na ka sorkar.

Nalor katei ka kam kaba la iarap da ka pisa, u Bah Jason S. Mawlong, uba long kum u MLA na Umsning, u la ai ka jingkular sha ki nongiarap ha ka koit ka khiah, ba un kren sha ka sorkar halor ka jingeh kaba la kynduh da ki nongtrei ha ka koit ka khiah, la ka long halor ka kam ban pynkiew ia ka jingsiew lem bad kiwei ki kam kiba iadei bad ki ASHA, Anganwadi bad Helper, khnang ba kan long ka jingmyntoi ia kitei ki nongiarap ba hakhmat eh ha ki kam jong ka koit ka khiah.
Halor katei ka jinglah da kitei ki nongmihkhmat ka Umsning Constituency, kitei ki nongtrei ha ka koit ka khiah, ki la pynpaw ia ka jingsngewnguh bad ai ruh ka jingkhublei kaba kyrpang ia kitei ki nongmihkhmat ka Umsning, namar ba ka jingkynmaw bad iarap kyrpang ia kitei ki nongtrei ha ka koit ka khiah.
Kiba la donlang ha katei ka sngi, ki kynthup ia u Bah Ivanlumlang Marbanniang, Co-Chairman ka Meghalaya Fish Farmer Development Agency, u Bah Dipul Ryntathiang, Vice Chairman ka MCCL, u Raja Brahma, BDO ka Umsning, u Dr. R Nongrum, BDO Umling lem bad kiwei de ki riew rangbah.