Sei ka VPP, da ka jingkhein briew ha u 1972, haba dawa ia ka bhah kam ha ka jylla

Shillong: Ka seng ba don ha ka liang Pyrshah ka Voice of the People Party (VPP) ka la ai jingmut ba ka percentage jong ka jingsam bhah na ka State Reservation Policy ia ki paid Khasi-Jaintia bad Garo, Scheduled Caste bad kiwei ki riewlum dei ban pynshong nongrim na ka jingdon paid jong ki, kat kum ka khana samari jong u 1971 bad ban jur ruh ban ithuh ia ki paid Khasi-Jaintia kum kawei ka Jaidbynriew.

Ha ka shithi ba kane ka seng ka la phah sha ka Expert Committee haba iadei bad ka State Reservation Policy ha ka sngi Thohdieng, u President jong ka VPP,u bah Ardent M Basaiawmoit ula ong, ka percentage jong ka jing bhah kam ia ki Khasi-Jaintia, Garo, Scheduled Caste bad kiwei ki paid riewlum ka dei ban pynshong nongrim katkum ka jingdon paid jong ki, ha ka khana samari jong u snem 1971 bad ban shim ia ka Jaidbynriew Khasi-Jaintia ka kum kawei ka Jaidbynriew”.

U la ong ruh ba ka State Job Reservation Policy, wat la ka la kdew shai ba “ka jingmihkhmat kan long kat kum ka jingdon paid” hynrei ym shym la shim pat ia ka jingkhein jong ka khana samari ha kaba sam ia ka percentage jong ka jingsam bhah ha ka thungkam thungjam.

Namarkata, ka jingsam bhah ba 40 % ia ki Khasi-Jaintia, 40 % ia ki Garo bad 5 % ia ki SC bad kiwei ki ST ka dei ka bym iahap satia bad bym biang jingkhein. Ka jingsam percentage ka dei kaba shu mutdur ha ka jaka ban iaid kat kum ka jingkhein. Kumta, ka dei kaba iaid pyrshah ia ka jingthmu jong ka policy” u la ong haba bynrap ba ka jingbym lah jong ka sorkar Meghalaya ban pyntreikam ia ka Roster System ban pyntreikam ha ka Job Reservation, khatduh ka dei kaba la pynbeit da ka hukum jong ka Ïing bishar jong ka Meghalaya High Court ha u snem 2022.

Haba peit ia ka jingbym ïoh bhah jong kito kynhun jaidbynriew ka dei namar kam shym la don satia ka jingkylla ha ka polisi ha u Snem 1972 katkum ka percentage ba la bate, kumta dei ban pynbeit noh nangne sha khmat bad ka seng ka dawa ruh, ba dei ban ai percentage la ka jong ia ki SC bad kiwei ki ST haba buh kyndon ba ka jingthungkam ia ki ha ka reserve bad unreserved post hapoh ka jylla ka dei ban long ia kiba nang ban kren ia ki Associate Official Language ka Jylla, kata ka ktien Khasi lane Garo bad tang ki nongshong shnong jong ka jylla Meghalaya ki dei ban shah thung kam, la ka dei ha ki kam ba la buh bhah ne bym pat buh bhah ruh ha Meghalaya,ula bynrap.