Sei ka China, da ki puh shilum, ban khang ia ka wah ban tuid sha India

Ka China, kam dei tangba ka pyniap ia 20 ngut ki shipai jong ka India, hynrei, ka la dep ban khang lynti ia ka jingiaid jong ka wah, kaba tuid sha India.

Ka khubor jong ka Daily Mail, ka iathuh ba ka jingshondur lyngba u satellite, ka pyni, ia katei ka jingtrei, kaba la pyntrei da ka China, ha ka jaka kaba don haduh 14,000 na sla khyndew ha Galwan, jong ka Ladakh.

Katei ka dur, ka pyni ba ka China, ka pyndonkam da ki puh shilum ban khang sbak, ia ka jing iaid lynti jong ka wah sha India. La iathuh ba kitei ki mashin kiba khlain bor bha, ki dei kiba la ioh shondur ha ka sngi hat majai ba ladep bad la ngeit ruh ba ki shipai China, ki leit tur na katei ka jaka ban ialeh bad ki shipai India bad ki pyndonkam ruh da kitei hi ki tiar kiba nep bad kiba mynsaw bha ban pyniap klep ia ki shipai India.

Ki stad lum jingtip na America, ki iathuh ba ka China, ka la dep khang lynti ia ka wah, kaba tuid sha India, na ka jaka, kaba don ha u Line of Actual Control, kaba dei ka jaka ba ka India, ka la dep thaw ia ka jingkieng kaba 200 phut ban iaid na shiliang sha shiliang ka wah.

Ki dur ba la shon na u satellite, ki pyni ba ka don ka jingtih khyndew kaba jubor bha bha, ha kaba la pynkylla ia ka jinglong jingman ka jaka ha katei ka thain bad la nang pynheh ia ki surok bad la pynkylla ia ka lynti iaid jong ka wah. U Jeffrey Lewis, director ka East Asia Nonproliferation Program ha California’s Middlebury Institute of International Studies, u iathuh ba ka China, ka khang lynti ia ka jingiaid jong ka wah bad ula shuh shuh “Ki don da ki ton tylli ki kali ha baroh arliang, ha kaba ka China, ka don bun bah ki kali ha ka liang jongka bad na ka jingkhein, la iohi, ba ki don 30-40 tylli ki kali jong ka India bad da ki spah tylli ki kali jong ka China”. La pyni ruh ia ka dur, ha kaba ki don ki puh shilum kiba heh ha syndah jong ka Wah Galwan.

Ka India, ka la nang iai trei ia katei ka jingkieng kaba 200 phut ha Galwan, hynrei, la iathuh, ba katei ka jingkieng, kan nym don jingmut shuh, lada ka jingiaid lynti jong ka wah, la pynkylla noh shawei pat.