Sei daw ki kali kamai, dukan; bym kamai ha ka pakhang shnong

Shillong, 5 Jylliew:
La iohi ba ha kine ki sngi ka High Court ka la pan jingpynshai na ki kali kamai ,ki dukan, bad kiwei ba ki dei ban ai jubab balei ki khang du kan, balei ki sangeh kamai ha ka 27 tarik u jymmang kaba dei ka sngi pakhang shnong ka HNLC. U nongthohkhubor u la leit ban twad jingmut na ki nongniah taxi kamai, ki nongdie dukan ban tip kaei ka jubab kaba kin lei tai sha ka High Court ba ki la khang dukan ha katei ka sngi. Haba ia kren kyllum bad ki nongniah Taxi kamai kumno kin lei tai jubab sha ka ing bishar, ka jubab kaba la ioh kyllum na ki ka long ba don napdeng jong ki kinba la ong ba kim ju sei kali ha ka sngi balang, don kiba ong ba ka duh ka shaka shilliang, don kiba ong ba ki pang suhkpoh, baiong khlieh, don kiba ong ba la lut petrol bad haba ki mut leit theh unphniang na Pump ka Pum ruh ka khang, don kiba ong ba ki la mih surok ban kamai, hynrei ym don briew pat ha surok, kam myntoi ia ki ban shu mareh sharum shaneng ban pynlut kai ia ka Petrol khlem mih kamai, don ruh kiba ong ba ki leit buh briew sha Bhoi, sha West Khasi Hills ba don nongpang, don pat kiba ong ba ki donkam leit jingleit hi ki malik ki khlem ioh sei kali shuh.
Haba twad jingmut na ki shongdukan ruh ki la ong ba haba ym don briew ba iaid sharum shaneng kin plie dukan iano haba ym don nongthied, don pat kiba ong ba ha katei ka sngi kaba dei ka sngi balang kim ju plie dukan, don kiba ong bym wan ki nongtrei ba ki pang.
Lah ban kdew ba ka High Court ka la pan jubab na ki kali kamai, ki dukan, ki Hotel, balei ba kim plie dukan ha katei ka sngi bad ba kynjah jar jar ka surok ha ka sngi pakhang shnong ka HNLC watla ki bor sorkar ki la pynthikna na ka por sha ka por ba ki la pynbiang ka lad jingiada kaba paka. Lah ruh ban kdew ba ka High Court ka la hukum ia ki kot khubor ba kim dei shuh ban pynmih ia ki khubor ia khih ne ki khubor pakhang shnong da kino kino ki seng nangne shakhmat.