Sdien phasi u rangbah ialade, bym ioh sei tulop napoh Bank

Nongpoh: Uwei u rangbah uba la tip kyrteng kum u Dum Bokca (48) snem, na ka shnong Barigang ha ki thain Patharkhmah, Ri Bhoi District, la kynnoh ba u la bthat noh iala ka jingim ha u tyllai phasi, tang namar ba u la shah kyntait ha ka por ba u pan jingiarap na ki nongtrei hapoh ka State Bank of India ha Patharkhmah Branch, kaba dei ruh kaba utei u rangbah u la pan jingiarap na kitei ki nongtrei, na ka bynta ban sei ia ka Tulop, kaba u dei ban ioh.

Haba pyntip halor katei ka jingjia kaba la jia naduh ka 4 tarik mynta u bnai, u Bah Comfort Doloi, uwei na ki riew rangbah ha ka thain Patharkhmah, u la iathuh ba u tei u rangbah uba trei kum u muster roll ha ka tnat PWD.

Haba batai bniah halor ka daw kaba la pynlong ia utei u rangbah ba un bthat noh ia ka jingim, u Bah Comfort Doloi, u la iathuh ba ka la don ka sngi kaba utei u rangbah u la thmu ban leit sei pisa na katei ka SBI ha Patharkhmah, kata hadein ba ka tnat PWD ka la pynlait ia ka tulop jong u ha u ne u bnai.
U la iathuh ruh, ba ynda utei u rangbah u la poi ha katei ka Bank, u la thoh da ka withdrawal slip ban ioh ban sei ia ka pisa, hynrei dei hadien ba u leit mih ha ki counter u la shah kyntait ban ioh ia ka pisa, namar kitei nongtrei Bank ki la ai daw ba um lah ban sei pisa da ka withdrawal slip, hynrei u dei ban sei beit da ka ATM card.
Hynrei utei u rangbah, u la pynshai ba um don satia ia ka ATM bad kyrpad ruh ban pyniarap ban iohlad ban sei ia ka pisa jong u, na ka liang ki nongtrei katei ka bank ki la kyntait beit war, iathuh u Bah Doloi.
Kumta namar ka jingbyniaw halor ka jingbym ioh ban sei ia ka Tulop, utei u rangbah u la mih bak na katei ka bank da jingsngewsih kaba khraw bad ynda u la poi haing u la sdien phasi syndon ialade, pyntip u Bah Doloi.
Haba iadei bad katei ka jingjia ba sngewsih, u Bah Comfort Doloi u la kyrpad ia ki bor bahalor jong ka State Bank of India, ba kin phah ban tohkit halor katei ka jingjia bad ruh ban shim ia ki lad ki lynti kumno ban pynbha bad pynbiang ia ki rukom ai jingshakri da ki nongtrei jong ka SBI Patharkhmah Branch.