Sdang tynruh dieng tyllaw, U Ma Pala ban pynhap shuki ia u Mukul

Shillong, 03 Rymphang:
Ka khubor hamsaia ka la her biang mynta ba ka la don ka jingiakhih na ki MLA ka Congress ban pynhap shuki ia u Mukul Sangma kum u Myntri Rangbah bad, katkum ka khubor ba la iohlum, la kynnoh ba u MP ka Shillong u Bah Vincent H Pala u dei uwei na ki nongialam napoh ban tynruh diengkot ban pynkhyllem ia ka shuki u Mukul.
Ka khubor wur wur wer wer, la iathuh ba u Bah Pala u lah ban iawer bamja miet ia ki MLA ki bym sngew tynnad ia u Mukul bad kane ka jingbam ja miet, kan dei ka rynsan saindur ia ka jingialehkai sain pyrthei, kaba la don eiei halor jongka.
Kane ka jingialang bamja miet kaba u Bah Pala u lah ban khot, ka long hadien ba ka jingia[bteng sla 7] lang ba khluit bha ka MPCC dang shen, kaba iakren ia ki kam jong ka sorkar MUA-II khapoh jingialam u Myntri Rangbah ka jylla.
Hynrei haba u nongthoh khubor, u la pyrshang ban twad jingmut halor kane na ki katto katne ki briew ka Congress, ki la kam ba kim bna eiei ia kane ka jingialang bam ja miet.
“Ngam bna eiei ban don kum ka kata ka jingialang ban khot u MP”, la ong uwei u dkhot ka Congress.
Ha kawei ka khubor, la iathuh ba bun ki MLA bad ki myntri sorkar bad ki MDC kila thnum tyngeh ia ka jingleh kane ka sorkar hapoh ka jingialam u Mukul Sangma bad kine ki Myntri, MLA bad MDC ka Congress kila pynpaw ïa ka jingartatien ïa ki rukom treikam ka Sorkar MUA-II kaba mushlia naduh ka kam Rangbah Shnong, ka jingkyntur pud ka MUDA, ka jingpyni bor ïa ki nongtrei Sorkar, ka jingpyrshang iuhroit ïa ki Autonomous District Council (ADC) bad kiwei kiwei.
La ïathuh ba kane ka sur jong ki myntri sorkar, ki MLA bad ki MDC ka Congress kala mih ha ka jingïalang jong ka Meghalaya Pradesh Congress Committee (MPCC) kaba long ha ka sngi Nyngkong, kaba la ïadonlang u MP ka Lok Sabha Ma Vincent H Pala nalor ki Myntri sorkar.
La iathuh ba don ki Myntri bad ki MLA kiba la kren tyngeh ha ka jingialang ka MPCC ba kiba kwah ban pynkylla noh ïa u nongïalam ha ka Sorkar Jylla, ioh duh ia ka jingshaniah ha ki paidbah namar ki kam ba ka sorkar ka la leh.