Sdang ther u slap bah ha ka nongbah Shillong, yn khie sa ka eriong

Shillong:Ki 24 kynta ba ladep, ki la long ki kynta kiba jur slap bha ha ka Jylla Meghalaya, ha kaba ka jingkhein, kaba wan na ka tnat peit mariang jong ka sorkar India, ka pyni ba ka jinghap slap ha ka nongbah Shillong, ka long 25.4 millimetre.

Katei ka jinghap slap, ka long ha ka sien kaba nyngkong eh jong une u snem 2019, kaba la jia hadien ka jingrang ryngkhiang ha kine ki bun bun bnai ba ladep bad katei kam shym la jia satia tang ha ka nongbah Shillong, hynrei katei ka jingkhie eriong, ka la ktah kham jur ha ki shnong kyndong jong ka Ri Khasi Jaintia.

Ka tnat peit mariang, ka maham ruh ba ha ki 24 kynta, ki ban sa wan, kan dang don biang hi ka jingkhie eriong lem bad ka jinghap slap, ha kaba ka jingkhlain jong ka eriong, kan long hapdeng ka 50 haduh 60 Kilometre ha ka shi kynta, ha ki katto katne ki bynta jong ka Jylla bad kan don ruh sa ka jingwan lang jong u slap uba jur ha kine ki kynta ki ban sa wan.