Sdang suhthied ka BJP sha Shella bad Sohra

Shillong,28 Naiwieng:
Ka BJP ka la sdang ban rung sha manla ki kyndong kynshrot jong ka Sohra bad Shella konstitwensi ban pynshai paidbah ia ka nongrim jong katei ka seng bad kumjuh ruh ia ki skhim ka sorkar pdeng ki ba dei ban poi sha u paidbah. Ha kine ki khyndiat sngi ka la don ka jingialang pynshai jong katei ka seng ha Pdeng Shnong, Sohra.
La pynshai paidbah shaphang ki skhim ka sorkar pdeng da u President jong ka BJP East Khasi Hills u bah Babul Suting, ha ryngkat ka jingdonlang u Organiser katei ka seng ha Shella konstitwensi u ba Jropsing Nongkhlaw, u President ka Shella Mandal u bah Tolmolin Yadborn, la pyniaid ia ka jingialang da u President jong ka Sohra Mandal u bah P.Nongrum.
Katkum ka jingiathuh ki nongialam katei ka seng ki la ong ba katba mih ki sngi ki nangbun ki paidbah ha kitei ki ar tylli ki konstitwensi kiba leit ia soh sha katei ka seng bad ka jingpynrung dkhot ka dang iaid shaid shaid bad kan long ruh ka jingpynkhreh na ka bynta ka elekshon MLA 2018.