Shillong: Haba ia kren bad ki nongthohkhubor myn hynnin ka sngi, hadien ka jingwan tohkit jong u Investigating Officer u bah Gilbert Marshilong ka kong Agnes Kharshiing ka la ong ba utei u heh pulit u la iathuh ia ka ba ka jingthwet ia ki briew kiba donkti ka dang iaid shakhmat bad ki pulit ki dang thwet ruh ia u Kynsai War uba la suba donkti ha ka jingthombor ia ka bad ka Amita R Sangma.
U Conrad Sangma, uba ia shondur lang bad U Ma Nidamon Chullet, ha ka por ba U Ma Chullet, u pyniasoh ialade sha ka seng NPP.
Ka kong Agnes ka la ong ba mynta ka la don ka jingpyrshang na ka sorkar ban pynkynriah kam ia ki pulit kiba trei hok ia ka kam jong ki bad ki briew kiba donkti ruh ki la pyrshang ban phet rieh na kane ka jylla. Ka la iathuh ba ki briew kiba la donkti ban shoh ia ka bad ka Amita ki dei ki briew na ki seng saiñpyrthei kiba don ha ka sorkar. Ka la pynpaw ia ka jingbynniaw ba haduh mynta ka NPP ka khlem pat beh seng ne leh eiei ia u Nidamon Chullet bad bynrap ba ka jingbym leh eiei ia kitei ki briew ka pyni ba ki briew ba don ha ka bor baroh ki long kumjuh bad ka jingtrei hok kam don, hynrei la ailad ia ki briew ba leh kam sniew.
Shuh shuh ka la iathuh ba u Kynsai u la byrngem hakhmat kiwei pat ki briew kiba la iathuh ia ka naduh u snem ba la dep ha kaba ka la pynkem ia ki trok kit dewiong beain jong u, ka la iathuh ba ha kato ka por u la phone ia ka ban iakren hynrei ka khlem treh satia, wat la u la pyrshang ban iakren lyngba u wei u pulit. Ka la iathuh ba ha ka por ba ioh kem ia kitei ki trok la lap ruh ba kim don satia ia ka Challan bad iathuh ba ia ka Challan la shu thied na Mookyndur, katba ka kyrteng pat ka dei jong ki Garo, bad ong ba kane ka jingleh ka pynpaw shai ba ki ka don ka jingtuh ba na shapoh kaba la pynlong ia ka jylla ban duhnong khmatam ha kane ka por ba ka don ha ka jinghiran pisa. Ha kajuh ka por ka la pynpaw ba kam hun satia ia ka jingthung jong ka sorkar tang da ka Independent Enquiry da ka ba ong ruh ba ka dei tang ka jingpynlut kai ia ka por bad ka pisa.