Sdang pynduna ka HSPDP ia ka bor treikam u bah Ardent kum u President

Shillong, 5’lyngkot:
Wat la ki nongialam ka seng HSPDP ki la pynpaw sha ki nongthohkhubor ba katei ka seng ka ia tylli mlon mynta hynrei don pat napdeng jong ki kiba la pbuhrieh noh ia ka kyrteng jong ki, ki iathuh ba katei ka seng ka la don jingthmu la katto katne por ban pynhap shuki noh ia u President rangbah jong ka u bah Ardent M Basaiawmoit hynrei kin ym leh pat hak dak hynrei kin shu pynduna ia ka bor treikam jong u kum u President bad da katei ka jingle ki khmih lynti ba un sa thait bad jlep bad un sa shu ieh noh dalade hi ia katei ka kam. La iathuh ba mian pa mian ki la sdang ban khyrwait suki jai jai ban pynjlep ia u bah Ardent ban bat kum u nongialam rangbah jong ki.
Dang mynhynin ka sngi haba kren ki nongialam HSPDP ki kren sha ki nongthohkhubor ha Shillong Press Club u nongialam rangbah jong ki um don lang hynrei jan baroh ki dkhot ka CEC ki la don lut. U Rupang u la tih bniah ban tip balei u bah Ardent um donlang bad ki. Haba ia kren bad katto katne ngut ki nongialam ki la iathuh ba ka jingialang CEC kaba la long mynhynin ka sngi ka la ai bor ha u General Secretary katei ka seng u bah Witting Mawsor uba dei ruh u nongaiktien katei ka seng ban leit kren sha ki nongthohkhubor.
Ki la iathuh ruh ba ka CEC ka la khang ia u bah Ardent ban leit kren sha ki kotkhubor, nangta ki la ong ba ka la pyrkhing ruh ba u President um dei shuh ban dang kren nangne shakhmat sha ki nongthohkhubor khlem da pynkupbor da ka CEC bad kaei kaba u hap ban kren ne shim rai ruh ka kdei beit ban iaid lyngba ka rai jong ka CEC.
Haba twad jingmut na kaei ka daw ba la pyrkhing ia u bah Ardent ban kren sha ki kotkhubor- nyngkong ki la kyrngah ban iathuh hynrei kham hadien ki la ong ba namar bunsien haba u kren u kren ruh ia kaei kaba ka CEC kam shym la shim rai bad ki shim ba katei ka jingkren ka pynmih bun ki ishu kiba kiwei pat ki seng kin ioh lad ban khyrwait ia ka seng HSPDP bad ki kdew ba ia katei ki la mad ha ka elekshon MDC shiteng samoi ha kaba ki la ong ba katei ka seng ka rem ha ki konstitwensi bym poi pyrkhat ban rem tang na ka daw ka jingshah kynthah ha kiwei pat ki seng halor katto katne tylli ki ishu.