Ka jingiakhih jong ki nonghikai ka la ktah jur ia ki khynnah skul namar ba ym don nonghikai ban shim klas. Ka jingiakhih jong ki nonghikai ka la poi sha ka 6 sngi naduh ka 27, 29 tarik Nailar, bad ha ka 3, 4 bad 5 tarik Nailur bad sa mynta ka 11 tarik ban long haduh ka 13 tarik Nailur.
Kane ka jingiakhih jong ki nonghikai ka long namar ka jingmynthi jong ka sorkar ia ka jingdawa bad khamtam khlem khot iakren satia haduh kine ki sngi.
Kane ka jingleh jong ka sorkar khamtam ka jingleh kuman bad adlukhi jong u Symbud Myntri Rangbah ba peit ia ka pule puthi ka jylla u Dr Roytre Christopher Laloo bad u Myntri Rangbah Mukul Sangma, ka pyni ia ka jinglong ehrang bad khlem pyrkhat ia ka jingshah ktah jong ki khynnah skul bad ruh ia ka pule puthi ha ka jylla baroh.
Haba iakren bad katto katne ki kmie, ki la pynpaw ia ka jinglyngngoh ia ka jingleh ki nongmihkhmat paidbah kiba la jied hi da u paidbah hynrei ki leh kum ki kynrad.
U nongthoh khubor uba la ioh lad ban leit peit ha ki katto katne tylli ki skul ha ka nongbah hynne ka sngi Balang, la shem ba ki skul kila sawa sa tang ki sur jong ki khynnah skul kiba iashongkai namar bym don nonghikai. Don ruh kiba shu pynlait noh ia ki khynnah namar bym don nonghikai.
Ki nonghikai ki la pynlong da ka jingiakhih ban sangeh trei ha ki lai sngi kynthih naduh ka 11 tarik haduh ka 13 tarik. Kane ka dei ka kylla jingiakhih kaba ar hadien kaba nyngkong ka la kut. Katkum ka jingtip, la sngewthuh ba ki nonghikai kin pynlong shuh shuh ia ka jingiakhih ha kine ki sngi lada ka sorkarkam khot iakren ia ki ne ka dang sngap mynthi.
Kane ka jingiakhih jong ki nonghikai ka la ktah jur ia ki khynnah skul jong baroh kawei ka jylla kiba hap hapoh ka lama jong ka Joint Action Committee of All Teachers Association of Meghalaya (JACATAM) ba kynthup naduh ki lower primary haduh ki higher secondary skul ha baroh kawei ka jylla.
Hynrei haduh une u pud ba la poi ka jingiakhih, ka sorkar ka I kumba kam don khmat bad kam don shkor.
Ki khynnah skul na ki skul bapher bapher jong ka nongbah bad kiwei ki jaka, ki la pynpaw ia ka jingkyrshan ba pura ia ka jingiakhih jong ki nonghikai pyrshah ia ka sorkar hapoh ka lama ka JACATAM.
Ha ka jingpynlait khubor ba la iasoi da ki spah ngut ki khynnah skul hynne ka sngi Hatmajai, ki la ong ba ka long kaba sngewkhi shibun ba ka sorkar ka la leh bum suidniew ia ki nonghikai watla ki la pynlong ia ki jingiakhih.
“Ngi sngewkhia kaba khraw halor ka jingkuman ne mynthi ka sorkar ban sngap ne shah shkor ia ka jingkwah jong ki nonghikai baieit jong ngi haduh ba kin pynlong da ka jingiakhih bad ka jingpep skul kaba ktah shibun ia ka pule puthi jong ngi”, la ong ki khynnah skul ha ka kyrwoh ba la pynlait sha ki lad pathai khubor hynne ka sngi.
Ki khynnah skul, ki la ong ba ha ka jingshisha kim kwah ba ki nonghikai kin jah ne pep skul namar ba khlem ma ki, ngim lah satia ban ioh ia ka jingtip bad ka jingnang jingstad. “Ngi sngew ba ka jingiakhih jong ki nonghikai ka ktah shibun ia ngi ki khynnah kiba dang donkam ia ka jinghikai jong ngi man ka sngi”,ki la ong.
Hynrei watla ki long tang ki khynnah skul hynrei ngi kwah ban buh ia ka jingkyntu ia ka sorkar kaba long kum ka kmie ba kam dei shuh ban dang pynslem ia ka jingkwah jong ki nonghikai namar ba ngi dang iap ne nang jynjar pynban ma ngi ki khynnah skulk um ki phlang ne sohpdung bad ki la kyrpad ba ka sorkar ka dei ban thaw noh ia ki lad ki lynti wut wut ban wanrah noh ia ka jingsngewthuh jingmut bad ki nonghikai khnang ban ngin nym iaduh klas shuh khamtam ba ngi donkam eh ia ki nonghikai ha kine ki por ba la jan ka eksamin final, la ong shuh shuh ki khynnah skul.
Phi don ban ong eiei?