Sdang peit sani ka sorkar Jylla, ia ka Bakhlapara bad Pilangkata

Shillong:Kum shi bynta ban pyniaid shakhmat ia ka jingthmu ban pynbeit noh ia u pud u sam, hapdeng ka jylla Assam bad jylla Megha laya na ka liang U Symbud myntri rang bah ka jylla, u ba long ruh u Chairman ka Ri-Bhoi District Committee jong ka sorkar, u bah Prestone Tynsong u la iathuh ba ban rah ia ki mat iakren kiba bniah, kum u Chairman u la kyrpad ia baroh ki dkhot ka komiti ba kin pynbiang ia ki sakhi satar ha ka ba ia dei bad ki jaka ki puta ki ba hap hapoh ka jylla Meghalaya.

Haba ia kren bad ki lad pathai khubor, na ka liang u Chairman ka Ri Bhoi District Committee, u la iathuh ba ha ka ba ia dei bad ka jingpynbeit ia u pud u sam ha Ri-Bhoi la shim shwa tang ar ki bynta, kata ia ka Bakhlapara Cluster kaba don kumba 5 shnong bad ka Khanapara-Pilangkata ba kynthup ia ki 7 shnong.

Haba batai shuwa halor ka jingphah pynkhreh ia ki sakhi satar, na ka liang u Chairman u la iathuh ba yn da ki dkhot ka Comitee, ki la dep ban pynbiang ia ki sakhi satar, yn sa bishar bniah lyngba ki san tylli ki nongrim, ban tip ia ka khana sah pateng (historical background), ki nongshong shnong ki kren ka ktien da ka ktien aiu bad ka niam ka rukom, ia ki kam pynroi na ka sorkar, bad ia ka rai tylli lang jong ki nongshong shnong ba la ki kwah shano ban don bad khatduh eh ka jingiadei na kawei ka shnong sha kawei pat ne ka (geographical).

U bah Tynsong, mynta ka sngi u la iathuh ba na ka liang jong ka sorkar jylla, ka la shim khia bha ia ka mat ban pynbeit ia u pud u sam hapdeng ka jylla Meghalaya bad ka jylla Assam.
U la iathuh ruh ba kane ka mat ka long kaba baroh shi katta ka ju wanrah ia ka jingiakynad hapdeng ki nongshong shnong ha ki ar jylla kumta na ka liang ka sorkar jylla ka la shimkhia da ki ar ngut ki Myntri Rangbah na ki ar jylla.
U Bah Prestone Tynsong u la iathuh ba ka jingialang ia mir jingmut jong ki ar ngut ki Myntri Rangbah ki ar jylla kaba la long ha Guwahati, la shong pyrkhat biang sa shisien halor katei ka mat khappud bad da kawei ka sur, ki la mynjur ban thaw noh da kawei ka komiti, kaba la tip kum ka Regional Committee bad na ka liang ka Meghalaya kan don lai tylli ki komiti, Ri-Bhoi, Jaintia bad West Khasi.

U Bah Prestone u la iathuh ruh ba ia kitei ki komiti, ka jylla ka la dep pynkhreh shwa ia ki, bad u la iathuh ba kum u Chairman na Ri-Bhoi district, la kynthup ia ki MLA, ki MDC, ki Syiem Hima, Syiem Raid, ki Rangbah Shnong jong ki shnong kiba shah ktah ha ka jingiakajia pud.