Sdang paw pynryngkew, ka jing ia kynad ki MLA Congress

Shillong, 25 Jymmang:
Ha ki khyndiat sngi ba ladep, ka la don ka jingmih khubor, ha ki katto katne tylli ki kotkhubor phareng ha Shillong, ba ka la mih ka jing ia kynad jong ki MLA Congress bad katei ka dei hadien jong ka result jong ka elekshon MP.
Kitei ki kotkhubor, ki pyni ruh ba U Sangma, un lah ban pynhap shuki myntri ia ki katto katne ngut ki MLA, ban pynjem mynsiem, ia kito kiba ialeh pyrshah ia u bad kiba lah ban shim beit, ba ki dei kiba kham iajan bad u Ma Vincent Pala,uba dei U MP, ba dang shu jop.
Ha ki kotkhubor, la kdew ruh, ba ka don ka jingiakynduh jong ki MLA Congress, kiba dei na Khasi Jaintia Hills, ha iing jong U bah DD Lapang, nongialam jong ka seng Congress bad katei lehse, kan dei sa kawei pat kaba lah ban ialam sha ka jingthmu ban pynkdiah nongialam noh ia U Mukul Sangma.
Ka don bha, ka jingkynnoh, ba ka jingshah rem jong u kandidet Congress na Tura, U Daryl Momin bad nangta sa ka jingialeh pyrshah jongu, ia u kandidet Congress na Shillong, ka la pynmih ia ka jing ia kynad, kaba jur hapdeng ki MLA Congress bad kumta, kiei kiei, kin lah ban long, ba un lah ban shah pynhap shuki, ha kano kano ka por, lane ba un lah ban weng myntri noh, ia ki katto katne ngut, hadien ka dorbar Jylla ka ban sdang naduh ka 6tarik Jylliew 2014 bad ka ban kut ha ka 16tarik Jylliew 2014.