“Sdang noh ia ka jingshna ia ka By-Pass ha Umsning”

Nongpoh, 18 Risaw:
Ka Federation of Khasi Jaintia & Garo People (FKJGP), North Khasi Hills District ka la dawa ba ka National Highway Authority of India (NHAI)  ka dei ban sdang noh shait shait ia ka jingpyntreikam ia ka surok By-Pass na Umsning  kaba la shu sah slem watla ka jingdonkam baroh la dep nadong shadong.U President ka FKJGP North Khasi Hills u Bah Eddie G Kharbani u la ong ba ka  seng ka la ioh ia ka jingud jingnam na ki paidbah ia ka jingsniew ka surok naduh na Umsning ter ter haduh Umtrew bad ka jingpynslem ban sdang ia ka jingtei ia ka surok Umsning Bypass ka la nang pynklumar jingmut ia ki paidbah.
”Ka seng ka la ioh jingtip  ba ki bor district ki la dep ban aiti lut ia ka jaka ban tei ia u surok Umsning Bypass sha ki bor jong ka NHAI, hynrei ka NHAI kam pat idak eiei ba kan sdang noh”, ong u Bah Kharbani.
Ka seng ka la dawa ba ka NHAI ba ka dei ban sdang noh mardor ia ka jingpyntrei ia u ne u surok na ka bynta ka bit ka biang jong ki paid nongleit nongwan.