Bah RM Shabong
Ka Ri Khasi Jaintia, la iohi, kumba ka don ka jing ia tyngkhuh kaba jur bha ha kine ki sngi bad kitei ki jing ia tyngkhuh ki long (i) ka jylli ka sain pyrthei (ii) ka jylli ka trei ka ktah bad (iii) ka jylli ka jing wan buhai ki briew kiba nabar.
Ka jylli ka sain pyrthei, la iohi ba ka la dap da ki ahor suda bad kata ka long ba ki nongialam paidbah, kim lah shuh ban teh lakam ia la ka jong ka ktien, ia la ka jong ka kular bad ia la ka jong ka jinglong nongialam jongki, hynrei la iohi kumba ki jingjia ki tyllun ha ka jingsngew politiks, ka jingthap myntoi bad ioh ei bad ka jingsngew jaitbynriew ka la nang hiar shi katdei bad lada ngi iakren ban sdang nalade, ka long ba ma ngi ki paidbah, ngi im ha ka jing pohjait kaba tasam shi katdei, ba ngi jied nongmihkhmat da kaba tare pisa bad katei pynlong ia uba jop ruh ba un tare kylliang ialade bad katei ka pynlong ba ngin ioh da ki lun daitmaw suda, ym dei ki proh jabieng ban iada ia ki khun ka ri.
Ha ka trei ka ktah, ngim kwah ban trei shitom bad ngi kwah da ki kam babu sahep suda bad ngi ia beh da ki phew hajar ngut, na ka bynta kawei ka kam peon lane chowkidar, hynrei ngim kwah ban trei ia ka kam lajong, lada dei ka kam trei misteri, ka kam trei karkhana lane kiwei pat ki kam bad haduh mynta, ngim lah ban im wat tang shisngi, lada kim don ki kharkaia, kiba pynbiang ja, pynbiang jhur ia ka Ri Khasi Jaintia jongngi.
Kaba khadduh, ka dei halor ka jingwan ki briew kiba nabar bad kata ka ju long rukom ba mangi ki Khasi, ngi ju burom ia kiba nabar bad ki nong kyndong lei lei kiba pli, tang shu lah poi u khar die tiar jot, ki la khot ha iing shet ja, ki la ai sha ai dud bad kumta ter ter bad ha ka trei iing trei iing trei sem, ka ai wai iing, ka khot bylla bad wat ha ka wad pyrsa, ngi ia beh da ki poi ei suda bad katei ka dei ka jingmlien jongngi ki Khasi.
Ha ka jaka ban don ki seng bhalang lane ki nongialam ki ban kren ia ki ain khyllah kiba iai mih na ka por sha ka por, kan jin da long kaba kongsan lada ki mih ki riew niam, ki samla pule, ki nongtrei kam lajong bad kiwei kiwei, ban tih tyllong ia kitei ki jingpang kiba don lai jait ha ka jaitbynriew bad lada ngi lah ban pynsngew thuh hangi iwei pa iwei ia ka mat kaba ong “sdang nalade” kumta khlem pep, ngin lah ban pyn kylla ia ka jinglong jong ka jaitbynriew bad ba ngin ieng ha la ki jong ki Kjat.
Phi don ban ong eiei?