Shillong: Kum ka jingleh bym patiaw bad ka jingleh mynthi jong ka sorkar jylla, ki nonghikai skul Adhoc kiba don hapoh ka shatri jong ka Federation of All School Teachers Of Meghalaya(FASTOM) kiba kynthup ia ki sawtylli ki kyrdan kata ka Lower Primary, Upper Primary, Secondary bad Higher Secondary ha ka 14 tarik u bnai Kyllalyngkot 2022 ki la pynbna ban sdang noh da ka jingiakhih ka ban sdang naduh ka 17 tarik u bnai Kyllalyngkot 2022 haduh ka 20 tarik u Kyllalyngkot 2022 bad ha ka 21 tarik u Kyllalyngkot pat kin rah da ka lama iong lada ka sorkar jylla kam khot ia kitei ki nonghikai sha ka miej jong ka jingiakren na ka bynta ka jingdawa ka jong ki ban pynkynmaw ia ka sorkar jylla ia ki jingkular ba ka la kular naduh u snem 2019 na ka bynta ban khot iakren ia kitei ki nonghikai ban kyntiew noh ia ki 7,090 ngut ki nonghikai Adhoc sha ki nonghikai deficit kiba don hapoh ka jylla. Ha ka jingsdang iakhih ka jong ki ha ka sngi nyngkong kata ka 17 tarik u bnai Kyllalyngkot 2022, katei ka kynhun ka la pynlong da ka jingiakhih hakhmat ka khyrdop jong ka ophis Secretariat naduh ka por 11 baje mynstep haduh ka por 4 baje janmiet.
Haba kren bad ki lad pathai khubor, u President jong ka FASTOM, u Bah Kenneth Shadap u la iathuh ba kane ka jingiakhih ka jong ki ka long ka jingtrei kaba ka sorkar ka la pynap la slem bah kaba la shah thok shi shah thok da ki katno sien shuh. U Bah Kenneth Shadap u la iathuh ba ha ka 27 tarik u bnai Nailur 2021, u Myntri Rangbah ka jylla u la khot iakren ia kitei ki nonghikai Adhoc bad u la kular hakhmat u Director bad u Deputy Director ba ia ka deficit system um lah satia ban ai bad na ka liang ki nonghikai Adhoc ki la dawa ba u dei ban ai noh ha ki da ka deficit pattern bad u Myntri Rangbah ruh u la hun ia kata hynrei naduh katei ka sngi katei ka kam ka la sahkut hajuh kaba la long pynban kum ka jingiakren kai bad ki khyllung.
U Bah Kenneth Shadap u la iathuh ruh ba u Myntri Rangbah ka jylla u la kular ba un sa khot iakren biang ia kitei ki nonghikai Adhoc ha u bnai Naiwieng hynrei u khlem khot satia bad la iaid u bnai Nohprah ruh u khlem khot iakren tad haduh mynta u snem thymmai ruh u khlem khot satia bad dei na kane ka daw kaba la pynlong ia kitei ki nonghikai ba kin khie bitar bad pynlong ka ki ba kin leit ieng hakhmat jong katei ka khyrdop Secretariat ban pyni ia ka jingpyrshah ka jong ki. Shuh shuh u Bah Kenneth Shadap u la iathuh ruh ba na ka liang u Myntri ka sorkar kmie u Ram Das Athawale u ba dei jong ka Social Justice and Empowerment of India u la thoh da ka shithi sha u Myntri Rangbah ka jylla ban khot ia kren noh mardor ia kitei ki nonghikai hynrei kata ruh ka khlem poi satia shano shano ruh.
U Bah Kenneth Shadap u la ong, “Mangi kum kita ki nonghikai kiba dei ki nongtei ia ka ri bad ia ka jaitbynriew kata ka mut khlem kheiñ snep khlem burom iangi kum kita ki briew kiba dei ban ioh ia ka burom ha ka imlang ka sahlang. Ngi ki Adhoc Tecahers ngi dei ki khun jong kajuh ka State bad jong kajuh ka sorkar”.
Ka jingthmu rah lama iong jong ki nonghikai skul Adhoc ha ka 21 tarik u bnai Kyllalyngkot 2022 ka long kum shibynta ban pyrshah ia ka jingrakhe dap 50 snem jong ka jylla kaba hap ha katei kajuh ka sngi.
Phi don ban ong eiei?