Shillong:Kiba bun tylli ki dukan die doh bapher bapher, kiba don hapoh ka Nongbah Shillong ha ka sngi Balang, ki la sdang ban pynkhuid ïa la ki dukan die doh jong ki bad ym tang ba ki la pynkhuid, hynrei ki la sdang ruh ban pynitynnad pynbha briew da kaba maramot bha bad ban airong.
Na kitei ki dukan kiba la sdang ban leh ïa kitei ki kam da kaba bud ruh ïa ka hukum ka Meghalaya High Court ba kidei ban long kiba leh khuid na ka bynta ka jingmyntoi ka koit ka khiah, ki dei kiba don ha Motphran bad sha kiwei pat ki bynta.
“Mynta hadien ba la ïohi ïa ka hukum jong ka Ïing Bishar Meghalaya High Court halor ka jingdonkam ban lehkhuid bad kumjuh ruh ban buh shapoh ïa ka doh da ka jingda ïit bad jingker bad bym dei shuh ban wah ne pynsdien ïa ki lyngkhot lyngkhai ki doh ba la ot, mait ne ba la pom kum ki Khlieh bad kiwei, kumta baroh na ngi kiba don ha kane ka laiñ mynta ka Sngi ngi la maramot pynthymmai ïa ki dukan kaba long ruh shibynta na ka jingbud ïa ka hukum ka Ïing Bishar,” ong ki nongdie doh haba kren bad u nongthoh khubor.
Lah ban pynkynmaw ba ki heh ophisar ka Food Safety Standard Authority of India (FSSAI) ki la pynlong dangshen ïa ki jingleit jurip ïa ki dukan die doh kiba don ha Nongbah Shillong, khamtam kito ki Municipal Market, ha Polo.
Ha katei ka jingkhynra ka Assistant Commissioner DBS Mukhim, ka la ong ba ki la shem katto katne ka doh ka bym long shuh wat ban bam, kumta ki la bthah ïa ki nongdie doh ha surok ban bret noh.
Ka Kong Mukhim ka la bynrap ruh ba katei ka jingleit khynra ka long halor ka hukum jong ka Meghalaya High Court kaba la bthah ïa ka sorkar ban leh eiei ïa ki dukan die doh kiba wah paidbah ha ki dukan ba kidei ban buh shapoh hapoh ka jingda ïa ka doh kaba la ot.
Ka la ong ba kum kine ki jingkhynra yn ïai bteng manla ka por bad la khang ïa ki nongdie doh ban wah ïa ka doh bad la bthah ba kin leh khuid hapoh ka dukan.
Ka Kong Mukhim ka la kyntu ïa kiba shong dukan ban burom ïa ka hukum ka High Court da kaba ong, “Ki dei ban sngewthuh ba kadei ka hukum ka High Court bad ki dei ban tei ka synduk ban buh ïa ka doh bad ym dei ban pyni paidbah.”
Lah ban pynkynmaw ruh ba ïa ka hukum la pynmih da ka division bench kaba donlang u Chief Justice Sanjib Banerjee bad u Justice Wanlura Diengdoh halor ka public interest litigation ba la ujor da ka Gau Gyan Foundation, ka seng kaba donkti ban ïada ïa ka Masi ha India.
Phi don ban ong eiei?