Sdang khroh biang U Ma Pala, ia 5ngut ki MLA, ba kin leit phai sha la sem

Shillong:U Ma Vincent Pala, President ka Meghalaya Pradesh Congress Committee (MPCC), u la pynpaw ba na ka liang ka seng, hi kan pdiang sngew ia ki 5 ngut ki MLA ki ba la shah suspen na ka party la da ki rai ban wan phai biang sha ka party.

“Ngim shem ladon kano kano ka jingthmu ban beh lane ban suspen ia ki, hynrei ka dei tang na ka bynta ka party hi, kaba ngi hap ban shim ia kane ka rai, hynrei ngi kmen lada kine ki san ngut kin wan phai biang sha ka party” la ong u bah Pala.

U la bynrap shuh shuh “Kumba ka long hi mynta ngim don kano kano ka jingwit ia ki, hynrei kaei ka jingbym lah pdiang na ka party Congress ka long, ba ki la rai ban iatrei lang bad ka party BJP bad lait nangne hi kim don kano kano ka daw pyrshah ia kine ki MLA ka party”.
Haba kylli ba hato kan lah ban long ba kine ki MLA ki lah ban shah beh na ka party, namar ba ki 5 ngut ki MLA ka party kim kwah ban jubab eiei ia ka showcause notice ba la phah da ka AICC u bah Pala u la ong “Ngam don bor eiei ha ka ne ka rai bad kan shong ha ka AICC la kan beh lane kan suspen ia ki, ha kaba halor kane ngan sa pyntip yn da nga la ioh kano kano ka rai na ka liang ka AICC”.

“Mynta hi ngam lah ban ong eiei, namar ba kam hap ha ka bor jong ngi, hynrei kaei kaba ngi lah ban leh ka long tang ban phah ia ki jingaijingmut jong ngi bad kan shong ha ka AICC ba kan shim kano kano ka rai halor kane ka bynta”u la bynrap shuh shuh.
U bah Pala u la ong ruh “Kam don kano kano ka kyndon ba buh ia ki, ba kin lah ban wan phai biang sha ka party hynrei ka long ba ki la shim ka rai ban ia trei lang bad ka sorkar ka ba synrop lang da ka party BJP ha kaba ngim kwah ban pdiang ia kata, lada ki weng noh ia ka jingkyrshan ngim don eiei ban wit ia ki”.
Halor ka jingong jong ki 5 ngut ki MLA ba ki la kyrshan ia ka sorkar kaba la ialam da ka party NPP ym ia ka BJP, u bah Pala u la ong “Ka don ka jingong ba phi iohi ia ka jingshisha, phi tip ia ka jingshisha hynrei phi ngeit ia ka jingthok, ki briew na ka jylla ki tip bha ia ka jingshisha da ka jingsaitkhuid jong ki kam ialam shaei shaei ruh”.